Երեկվա զորահանդես-հաշվետվությունը զուտ քարոզչական միջոցառում էր, որի սպառողը ՀՀ քաղաքացին էր, Azg.am-ի թղթակցի հետ զրույցում ասաց ռազմական փորձագետ Հայկ Նահապետյանը։
«Սովորաբար զորահանդեսներն արվում են ներքին սպառման համար՝ ժողովրդի մարտական ոգին բարձրացնելու նպատակով։ Օրինակ՝ այդպես եղել է 1941 թվականի նոյեմբերի 7-ին Մոսկվայում։ Հայտնի զորահանդեսը տեղի էր ունենում այն ժամանակ, երբ գերմանացիները քաղաքի մատույցներում էին։ Այդ զորահանդեսից զինծառայողները միանգամից գնում էին մարտի դաշտ։
Երևանյան զորահանդես-հաշվետվության սպառողն, ինչպես արդեն նշեցի, առաջին հերթին ՀՀ քաղաքացին էր՝ առաջիկա ընտրությունների նախաշեմին։ Այսինքն՝ կարելի է ասել, որ դա առաջին հերթին և հիմնականում նախընտրական միջոցառում էր»,- ասաց մեր զրուցակիցը։
Հարցին՝ որքա՞ն ազդեցիկ էր երեկ անցկացված զորահանդեսը, Հայկ Նահապետյանը պատասխանեց՝ նախ, ամեն ինչ չէ, որ ցուցադրվեց, որովհետև մենք ունենք զինատեսակներ, որոնք հակառակորդի համար շատ ավելի ահասարսուռ են, քան այն, ինչ ցուցադրվեց՝ մասնավորապես «Скат», «Ураган», «Смерч» համակարգերը, T-80 տանկերը։
«Այս զինատեսակները ցույց չեն տրվել։ Փոխարենն, ըստ Փաշինյանի, 8 միլիարդ դոլարի զենք է ցուցադրվել։ Բայց ես այլ բան ասեմ. ՀՀ քաղաքացիները հերթական անգամ մանիպուլյացիայի ենթարկվեցին, քանի որ զորահանդեսի ժամանակ ներկայացված զինատեսակների առյուծի բաժինը հայկական անվանումներով էին, բայց ոչ հայկական արտադրության։ Իսկ դրա իրավունքը մենք չունենք։ Նման քայլի նպատակը ՀՀ քաղաքացիների մոտ ենթագիտակցական մակարդակով համոզմունք առաջացնելն էր, որ եթե զինատեսակի անվանումը հայկական է, ապա զինատեսակն ինքն էլ հայկական արտադրության է։
Զորահանդեսը վարողը հայտարարում էր, թե որոնք էին հատկապես հայրենական արտադրության նմուշներ։ Դրանք հիմնականում երկու տիպի ականանետներ, անօդաչու թռչող սարքեր էին։ Իսկ ահա մարտը կառավարող ԱԹՍ-ն ներկայացվեց որպես հայկական, սակայն իրականում այն չինական CH-4 տիպի անօդաչու է։ Այսինքն՝ այն հայկականի հետ որևէ աղերս չունի։ Կրկնում եմ՝ նպատակը հետևյալն է. ՀՀ քաղաքացին տեսնի, որ օրվա իշխանությունները երկիրն ամբողջությամբ բերել են պաշտպանունակ վիճակի, ունեն սեփական արտադրություն, տարբեր զինատեսակներ, և հետևաբար ճիշտ կլինի, որպեսզի հունիսի 7-ին իր քվեն տա իշխող կուսակացությանը»,- նշեց ռազմական փորձագետը։
Ըստ մեր զրուցակցի՝ անհնար է արտասահմանյան զինտեխնիկան հայկականի անվան տակ ներկայացնելու կեղծիքը թաքցնել, և Հայաստանին զենք վաճառած ընկերությունների կողմից շուտով մեր դեմ հայցեր են ներկայացվելու, քանի որ յուրաքանչյուր զենք ունի իր անվանումն ու արտադրող երկիրը։
«Մեկ տասնյակից ավելի զինատեսակներ կային, որ հայկական չէին։ Հին աստվածներին, այսպես ասած, հանել էին մայրուղի և նրանց անունները դրել արտասահմանյան զինատեսակների վրա։ Մյուս կողմից, անընդունելի է նաև մարտական դրոշը փոխելը։ Այն ավելին արժե, քան զինծառայողի կյանքը։ Այդ դրոշի խորհուրդը կարմիր գույնն է, որովհետև հաճախ զինծառայողի կյանքի գնով է այն պաշտպանվում, որպեսզի հակառակորդի ձեռքը չընկնի։ Դրոշի գույնը փոխել էին, դարձրել կապույտ գույնի։
Ինչ վերաբերում է զինանշանի փոփոխությանը, ապա այն ամենն, ինչը նախկիններից է, Նիկոլ Փաշինյանը ցանկանում է ազատվել, բայց դա նրան չի հաջողվելու։ Օրինակ՝ «Իսկանդեր»-ն ինչո՞ւ ցույց չտվեցին. որովհետև այն ասոցացվում է ՀՀ երրորդ նախագահ Սերժ Սարգսյանի հետ։ Իշխանությունը փորձում է անտեսել, չտեսնելու տալ, բայց դրանից իրականությունը չի փոխվում»,- ամփոփեց Հայկ Նահապետյանը։
