Օրերս «Ֆաջր» միջազգային կինոփառատոնի հասարակայնության հետ կապերի վարչությունը հայտարարել էր, որ այս տարի 42-րդ փառատոնի միջազգային բաժնում մրցելու են 621 ֆիլմ 87 երկրից, այդ թվում՝ Հայաստանից:
Ասիական-իսլամական երկրների կինոմրցույթը այս տարվա փառատոնի մրցութային ենթախմբերի մաս է կազմելու: «Ֆաջր» կինոփառատոնը 10 օրով կանցկացվի 2024 թվականի փետրվարի 1-ից 11-ը: Կինոփառատոնի մրցութային բաժիններում մասնակիցները պայքարելու են հատուկ մրցանակի համար, որը կոչվում է «Բյուրեղյա Սիմորղ»: Փառատոնի մյուս մրցանակներն են Պատվո դիպլոմը եւ Ոսկե մեդալը:
Հարկ է նշել, որ այս տարի փառատոնին դիմել են ԱՄՆ-ն, Մյանմարը, Մալայզիան, Ֆրանսիան, Հնդկաստանը, Թուրքիան, Իտալիան, Եմենը, Բրազիլիան, Ռուսաստանը, Մոլդովան, Լիտվան, Արգենտինան, Իսպանիան, Գերմանիան, Մեքսիկան, Ալբանիան, Չինաստանը, Բրիտանիան եւ այլն: Փառատոնի սկզբում տեղի է ունենում որեւէ արվեստագետի մեծարմանը նվիրված արարողություն, իսկ վերջում հատուկ մրցանակներ են շնորհվում ժողովրդի քվեով ընտրված ֆիլմին: Այս կինոփառատոնը միշտ սպասված է եղել կինոգործիչների ու կինոսերների համար:
Ի դեպ, Հայաստանը մասնակցում է այդ փառատոնին սկսած 1990-ական թվականներից, երբ հետխորհրդային նորանկախ հանրապետությունը դիվանագիտական հարաբերություններ հաստատեց Իրանի հետ, իսկ այնուհետեւ՝ կողմերը կազմեցին մշակութային համագործակցության օրակարգը:
«Ֆաջր» թատերական փառատոնին Հայաստանը հանդես է գալիս երեք ներկայացումներով, որոնցից առաջինը «Համլետն» է, որի բեմադրող ռեժիսորն է Հայկ Իսրայելյանը: Այս ներկայացումը 55 րոպե տեւողությամբ բեմադրվել է Թեհրանի «Թաթրե Շահր» թատերական համալիրի «Չահարսու» դահլիճում երկու անգամ:
Ի դեպ, Աբովյան քաղաքի դրամատիկական թատրոնը «Ֆաջր» փառատոնի շրջանակներում «Սայե» թատերասրահում բեմադրել է «Համար 6» ներկայացումը: Իսկ հունվարի 21-ին «Արարատ» կենտրոնի «Կոմիտաս» թատերասրահում Հայ մշակութային «Արարատ» կենտրոնի Արվեստի միության նախաձեռնությամբ եւ ՀԱՅՖԵՍՏ-ի Իրանի մասնաճյուղի ներկայացուցչի համագործակցությամբ թեհրանահայ երեխաները դիտել են Հովհաննես Թումանյանի «Պոչատ աղվեսը» հեքիաթի հիման վրա պատրաստված համանուն ներկայացումը, որը բեմադրել է Աբովյանի դրամատիկական թատրոնը:
Այսպիսով, «Ֆաջր» փառատոնը կարծես դարձել է ամենամյա ստուգատես, որի շրջանակներում մշակույթի տարբեր ոլորտների հայ եւ իրանցի գործիչները գործակցության նոր կամուրջներ են գցում հարեւան ու բարեկամ երկրների միջեւ:
ԿԱՐԵՆ ՄԿՐՏՉՅԱՆ
