Սուրեն Սաֆարյանը բանաձեւում է բնությանը ներդաշնակվելով կատարելության հասնելու գաղափարը
Մարդկային էությունը բնության միջոցով բացահայտելու, բնության հավերժական զարգացումը երեւակայական փոխակերպումների ձեւապատկերներով ներկայացնելու, ստեղծագործական որոնումների նոր հանգրվանի հանգելու, գեղանկարչի՝ արարման մի նոր ուղու վրա ոտնակոխելու մասին էր Սուրեն Սաֆարյանի անհատական ցուցահանդեսը, որը բացվեց մարտի 26-ին Հայաստանի նկարիչների միության ցուցասրահում: Մարտյան այդ ջերմ օրվան համահունչ՝ նկարչի գունաշխարհն էր՝ հայկական հողի, այդ հողից վերեւ երկնքի եւ ամպերի, լուսավոր կամ ծաղկեղեն անձրեւումների, այդ հողից աճած ծաղիկների առէջ – վարսանդների խորհրդապատկերներով, իգական եւ արական սկիզբների մասին բազմիմաստ հուշումներով, շրջապատի՝ համարյա մանկան մաքուր, չպղտորված հայացքով, չկորսված անկեղծությամբ ընկալմամբ: Ի վերջո, այս ցուցահանդեսը, իմ տպավորությամբ, երջանկության եւ կատարելության հասնելու՝ նկարչի բռնած ուղու կամ թե այդ ուղին գեղարվեստի լեզվով ցուցանելու մասին էր:
«Բնության փոխակերպում» խորագրված ցուցահանդեսը նկարչի, մի տեսակ, վերադարձն էր դեպի արվեստ: Իր ստեղծագործական ընթացքը մի որոշ շրջան ընդմիջվել էր՝ պայմանավորված Նկարիչների միության նախագահությունը վարելու հանձնառությամբ: Սակայն, ոնց խոստովանում է նկարիչը, շնչառությունը ծանրանում էր առանց նկարչության, ու վերադարձավ իր արվեստանոց նոր մտահղացումներով, նոր զգացողություններով, թարմ գունամտածողությամբ:
Սուրեն Արամի Սաֆարյանն արվեստագետների անվանի գերդաստանից է, ժողովրդի բնորոշմամբ՝ նկարիչների «չորրորդ պորտը»: Նա արվեստի վաստակավոր գործիչ Արմեն Սաֆարյանի որդին է, Խորհրդային Հայաստանի ժողովրդական նկարիչ Սուրեն Սաֆարյանի թոռը, Հայաստանի վաստակավոր նկարիչ Սարգիս Սաֆարյանի ծոռը: Մասնագիտական կրթությունը ստացել է Երեւանի Գեղարվեստի պետական ակադեմիայում: Տակավին երիտասարդ՝ 25 տարեկանում դարձել է Հայաստանի նկարիչների միության անդամ: 2018 թվականին Հայաստանի նկարիչների միության 19-րդ համագումարում ընտրվել է նկարիչների միության նախագահ, իսկ 2019 թ.ին՝ Հայաստանի գեղարվեստի ակադեմիայի հոգաբարձուների խորհրդի նախագահ: Հանրապետական մի շարք ցուցահանդեսների մասնակից եւ կազմակերպիչ է, իր գործերը ներկայացվել են մի տասնյակից ավելի միջազգային ցուցահանդեսներում (Թբիլիսիում, Աշխաբադում, Մոսկվայում, Բեռլինում, Փարիզում, Ֆլորենցիայում, Պեկինում եւ այլուր): Ունեցել է անհատական ցուցահանդեսներ Երեւանում, Բուդապեշտում, Լյուբլյանայում:
Արվեստաբան, ցուցադրության համադրող Աննա Գալստյանը «Բնության փոխակերպում» ցուցահանդեսի բացման արարին շեշտեց, որ այն ազդարարում է Սուրեն Սաֆարյանի ստեղծագործական նոր փուլը, որն սկսվել է 2023 թվականին: «Այդ փուլով դարձյալ շարունակվում է բնության պատկերագրությունը, բայց այս անգամ՝ աբստակտ ոճով,- ասաց Ա. Գալստյանը:- Շատ դժվար է, լինելով նկարիչ, անցնել մի գեղարվեստական ոճից մյուսին եւ հանգրվանել աբստարկտ ոճում: Դա չի նշանակում, թե Սուրենի աշխատանքները կսահմանափակվեն միայն այս ոճով, բայց ուզում եմ նշանավորել այն պահը, երբ իր արվեստը բխեց այս վառ գույների ու ներդաշնակ պատկերագրության մեջ: Այս ցուցահանդեսի հիմնական ուղերձներից մեկն այն է, որ մարդը եւս հնարավորինս ադապտացվի, ներդաշնակվի բնությանը, բնության փոխակերպումներին: Մարդը ճկուն է, հարմարվող եւ միայն բնության թելադրանքով է կարող հասնել ներդաշնակության…»:
ՀԱՍՄԻԿ ՍԱՐԳՍՅԱՆ
