Կոմպոզիտոր Հասմիկ Հարությունյանի հաջողությունները միջազգային մրցույթներում

 ԱՄՆ-ում բնակվող մեր հայրենակից, երիտասարդ շնորհալի կոմպոզիտոր Հասմիկ Հարությունյանը սույն թվականի հուլիս-օգոստոս ամիսներին մասնակցելով «Monolit festival» արվեստի միջազգային առցանց մրցույթ-փառատոնին` արժանացել է առաջին կարգի մրցանակների եւ հրավիրվել Իսպանիա, որտեղ կատարվելու է նրա ստեղծագործությունը: Կոմպոզիտորը ներկայացել է թվով 10 մրցույթի (նույն մրցույթ-փառատոնի շրջանակներում), որոնք անցկացվել են` Ամերիկայում («American Charm»), Ֆրանսիայում («Art Marathon In France» ), Գերմանիայում (Art Marathon In Germany), Հունաստանում («Art Marathon In Greece» ), Ավստրալիայում («Under The Skies Of Australia»), Իսպանիայում («Paints Of The Spanish»), Անգլիայում («Welcome To England»), Արգենտինայում («Argentine Gahering»), Իտալիայում («Art marathon in Italy») եւ Կանադայում («Welcome to Canada»): Մրցույթներում ներկայացրել է մանկական եւ պատանեկան երգեր, որոնք բարձր գնահատականի են արժանացել հանձնախմբի անդամների կողմից: Հ. Հարությունյանի «Իմ քաղաք» երգի մասին դրական արձագանքելով հանձնախմբի անդամները նշել են. «Քանի որ մենք գնահատել ենք մասնակցությունը միայն որպես կոմպոզիտոր, մենք բարձր ենք գնահատել այս աշխատանքը: Այն լավն էր եւ պրոֆեսիոնալ: Տեսանելի է, որ ստեղծման ընթացքում հաշվի է առնվել նաեւ կատարողի տարիքը: Շնորհավորում ենք գերազանց աշխատանքի համար»:

Հասմիկ Հարությունյանը (ծնվ. 1984 թ., Երեւանում) սովորել է Երեւանի Ռոմանոս Մելիքյանի անվան պետական երաժշտական քոլեջի երաժշտության տեսություն բաժնում (1998-2022թթ.),  այնուհետեւ՝ Երեւանի Կոմիտասի անվան պետական կոնսերվատորիայի կոմպոզիցիայի բաժնում (2002-2007 թթ.) պրոֆեսոր Արամ Սաթյանի դասարանում: 2005-2021թթ. աշխատել է Երեւանի Ռոմանոս Մելիքյանի անվան երաժշտական պետական քոլեջում որպես դասախոս, այնուհետեւ՝ տնօրենի` ուսումնական աշխատանքների գծով տեղակալ: 2008-2019 թթ. աշխատել է Երեւանի Հայկանուշ Դանիելյանի անվան արվեստի դպրոցում՝ որպես կոմպոզիցիայի դասատու: 2023-ից առ այսօր աշխատում է ԱՄՆ-ի Գլենդեյլ քաղաքի Միջազգային երաժշտական  դպրոցում՝ (այժմ «Կրեսչենդո») որպես տեսական առարկաների եւ կոմպոզիցիայի դասատու, ինչպես նաեւ գրում է երգեր դպրոցի երգչախմբի համար:

2005-ից, որպես կոմպոզիտոր համագործակցել է «Արեւիկ» (այժմ «Արեւներ») Արմեն Դիվանյանի անվ. մանկապատանեկան անսամբլի հետ, ղեկավար՝ Արփինե Հովհաննիսյան: Այս համագործակցության արդյունքում, մասնակցելով բազմաթիվ մրցույթների՝ արժանացել է մի շարք մրցանակների:

Կոմպոզիտորը համագործակցում է նաեւ` 2023 թվականից հայկական երգչախմբային դիրիժորների ասոցիացիայի (ղեկավար` Գայանե Բաղդասարյան), «Համազգային Արեւմտյան ԱՄՆ Նաիրյան» երգչախմբի (դիրիժոր` Լուսինե Մելիքսեթյան), ԱՄՆ-ի Հայ Առաքելական Եկեղեցու Արեւմտյան առաջնորդարանի,  2024-ից ԱՄՆ-ի Փասադենա քաղաքի  AGBU երգչախմբի (ղեկավար` Նեկտար Միրաքյան) հետ: 2023-ից ղեկավարում է ԱՄՆ-ի Հայ-Ամերիկյան արվեստագետների ասոցացիայի (ՀԱԱԱ) Կոմպոզիտորների միության մասնաճյուղը: ԱՄՆ-ի Հայ-Ամերիկյան արվեստագետների ասոցացիայի  (ՀԱԱԱ, ղեկավար` Գարեգին Քարազյան) եւ ԱՄՆ-ի NACUSA-LA (National Association of Composers) Կոմպոզիտորների Ազգային ասոցացիայի անդամ է:

Մասնակցել է բազմաթիվ այլ մրցույթների, համերգների, փառատոների, վերապատրաստումների, արժանացել է մի շարք մրցանակների, շնորհակալագրերի եւ պատվոգրերի: Ի դեպ, վերջերս հանդես գալով որպես Էջմիածնի «Փոքրիկ քայլ» միջազգային երաժշտական 5-րդ մրցույթ-փառատոնի հանձնախմբի անդամ, ստացել է վկայական՝ փառատոնին մասնակցելու համար:

Ապրելով եւ ստեղծագործելով ԱՄՆ-ում՝ Հասմիկ Հարությունյանը ծավալում է մասնագիտական, ինչպես նաեւ հասարակակական ակտիվ գործունեություն, ներկայացնելով հայկական երաժշտական մշակույթը միջազգային ասպարեզում:

ԱՐՄԻՆԵ ԱԹՈՅԱՆ

Երաժշտագետ, կոմպոզիտոր