Սույն թվականի մայիսի 17-ին եւ 18-ին ՀՀ Գիտությունների ազգային ակադեմիայում կայացավ «Արվեստի հարցերը Արշակ Չոպանյանի «Անահիտ» հանդեսում» միջազգային գիտաժողովը, որը կազմակերպել էին ՀՀ ԳԱԱ Հայագիտության եւ հասարակական գիտությունների բաժանմունքը եւ ՀՀ ԳԱԱ Արվեստի ինստիտուտը:
Ողջույնի խոսքով հանդես եկավ ՀՀ ԳԱԱ Հայագիտության եւ հասարակական գիտությունների բաժանմունքի ակադեմիկոս-քարտուղար Յուրի Սուվարյանը՝ նշելով, որ 126 տարի առաջ հրատարակված «Անահիտ» հանդեսից այսօր էլ մի շարք դասեր ունենք քաղելու. առաջինը, որ հայերենը պետք է պահպանել եւ զարգացնել իբրեւ գիտական լեզու, եւ որ հանդեսում խորհուրդ է տրվում չդավանել միայն արեւմտյան կողմնորոշմանը, այլ, առհասարակ, բոլոր կողմորոշումները պետք է լինեն նախ եւ առաջ հայամետի շուրջ:
ՀՀ ԳԱԱ Արվեստի ինստիտուտի տնօրեն, ՀՀ արվեստի վաստակավոր գործիչ Աննա Ասատրյանը նշեց՝ պարբերական մամուլի ուսումնասիրությունն արվեստագիտության կարեւորագույն ուղղություններից մեկն է:
«Առաջին անգամ հայ ակադեմիական արվեստագիտությունն անդրադառնում է հայ պարբերական մամուլին՝ «Անահիտ» հանդեսի օրինակով: Հայտնի է, թե ինչ ծանրակշիռ նշանակություն եւ դեր ունի հայ պարբերական մամուլն արվեստագիտության, արվեստի քննադատության ձեւավորման, կայացման եւ զարգացման գործում: «Անահիտ» հանդեսը հրատարակել է ոչ միայն հոդվածներ Կոմիտասի գործունեության վերաբերյալ, նրա համերգային շրջագայությունների մասին, այլ նաեւ Կոմիտասի գիտական հետազոտությունների արդյունքները: Այնպես որ, երաժշտագիտության մեջ Չոպանյանը կանգնած է կոմիտասագիտության ակունքներում:», – ասաց Աննա Ասատրյանը:
Նա շեշտեց նաեւ արվեստի քննադատության կարեւորությունը: «Ներկայում մեր գիտնականները հեռացել են արվեստի քննադատությունից, եւ դա ցավոտ հարց է: Կարծում եմ, որ այս գիտաժողովը խթան կհանդիսանա, որպեսզի մեր գիտնականները գիտական հետազոտություններին զուգահեռ զբաղվեն նաեւ երաժշտական, թատերական եւ գեղարվեստական քննադատությամբ: Այս առումով գիտաժողովն ունի նաեւ կիրառական նշանակություն», – ասաց Աննա Ասատրյանը:
Գիտաժողովին զեկուցումներով հանդես եկան առաջատար գիտնականներ ու երիտասարդ հետազոտողներ Հայաստանից եւ արտերկրից՝ Ռուսաստանից, Ֆրանսիայից, Լիբանանից եւ Չինաստանից, բացահայտելով «Անահիտ» հանդեսի ներդրումը հայ արվեստագիտության՝ երաժշտագիտության, արվեստաբանության, թատերագիտության եւ ճարտարապետագիտության, ինչպես նաեւ գրականագիտության ասպարեզում: Նախատեսվում է առաջիկայում հրատարակել գիտաժողովի զեկուցումների ժողովածուն:
ԱՆՆԱ ԱԴԱՄՅԱՆ
