Փետրվարի 22-ին Ֆրանսիայում մեկնարկեց արվեստի «Պարիաներ» նախագծի արվեստի կացարանի եվրոպական փուլը, որին Հայաստանից մասնակցեցին վիզուալ արվեստագետ Լիլիթ Ստեփանյանը եւ երաժիշտ, քամանչահար Արմեն Զարգարյանը:
Արվեստի կացարանը տեղի ունեցավ Մոն-Դոֆա փոքր քաղաքում, որը հայտնի է իր ճարտարապետությամբ ու մշակութային հարուստ ժառանգությամբ: Եվ չնայած փոքր չափերին, Մոն-Դոֆայում մշտապես անցկացվում են մշակութային տարբեր միջոցառումներ, ներառյալ՝ փառատոներ, համերգներ եւ ցուցահանդեսներ:
Կացարանի ընթացքում հայ արվեստագետներն իրականացրին աշխատարաններ ֆրանսիական Էմբրան քաղաքում: Արմեն Զարգարյանը ֆրանսիացի ժամանակակից պարողների հետ միասին հայկական երաժշտությամբ համաստեղծման աշխատարան իրականցրին:
Լիլիթ Ստեփանյանը եւս իրականացրեց համաստեղծման աշխատարան՝ հրավիրելով Մոն-Դոֆայի, Էմբրանի ու շրջակա համայնքների անդամներին մասնակցելու ստեղծագործական գործընթացին, որը ներառում էր գրի առնել ու ասեղնագործել անձնական հիշողություններն ու զգացմունքներն իրենց քաղաքի մասին: Այն մասնակիցներին ներգրավեց հիշողության կապող ու առաջնորդող թելի ստեղծման, հյուսելու եւ քարտեզագրելու ու համայնքային կոլեկտիվ արվեստի աշխատանքի ստեղծման գործընթացին, որը ներկայացնում է նրանց հավաքական հիշողությունները, փորձառությունները, զգացմունքները եւ քաղաքի մասին պատկերացումները:
Ֆրանսիայում այս միջոցառումները տեղի են ունեցել «#Պարիաներ. Իրագործելով Եվրոպայի պատմական հիշողությունը» նախագծի շրջանակներում, որը համաֆինանսավորել է «Ստեղծարար Եվրոպա» ծրագիրը: Այն նպատակ ունի բացահայտել մարգինալացված անհատների չպատմված, հավաքական հիշողությունները, որոնք ձեւավորել են համայնքը եւ աստիճանաբար կառուցել նրա պատմական հիշողությունը:
Սեփ. թղթ.
