«Այսքան միայնակ երբեք չեմ եղել»

Berlin Art Week-ում ներկայացված են Հակոբ Հակոբյանի եւ 5 հայ երիտասարդների ստեղծագործություններ

Սեպտեմբերի 11-15 Բեռլինի արվեստի շաբաթ (Berlin Art Week) փառատոնին, որին մասնակցում են Գերմանիայի մայրաքաղաքի ժամանակակից արվեստի 100-ից ավելի հանրածանոթ դերակատարներ, ցուցասրահներ, թանգարաններ, անհատ հավաքորդներ, ներկայացված են նաեւ հայ նկարիչների ստեղծագործություններ՝ HK արվեստի հավաքորդի միջոցով: Բեռլինաբնակ Հովիկ Քյուրքջյանի (Hovig Kurkjian) անվան սկզբնատառերով HK արվեստի հավաքածուն, որ նրա մահվանից հետո տիկնոջ՝ Կարոլա Շիլդի հոգատարությամբ շարունակում է համալրվել, ձգտում մշտական  ցուցասրահ ունենալ, արդեն երկրորդ տարին է, ինչ հայ արվեստագետների գործերն է ներկայացնում Բեռլինի արվեստի շաբաթվա այցելուներին:

«Այսքան միայնակ երբեք չեմ եղել» (NEVER BEEN THIS LONELY) վերնագիրն է կրում ՆՓԱԿ-ի 6 հայ արվեստագետների՝ Մարի Բադալյանի, Մարգարիտա Ղազարյանի, Արամ Զուրաբյանի, Մարիամ Ալեքսանյանի, Սիլվանա Չոբանյանի եւ Վարպետի՝ Հակոբ Հակոբյանի ստեղծագործությունների ցուցադրությունը Բեռլինի արվեստի շաբաթվա շրջանակներում: Երիտասարդ ստեղծագործողներն իրենց 14 գործերով  «խաղում» են՝ կամ «համարձակվում» ավանդական արհեստները՝ ասեղնագործությունը, ուլունքագործությունը, տեքստիլը մերձեցնել կերպարվեստին: Բեռլինի արվեստի շաբաթվա այցելուներին Հակոբյանի 13 գործերը ներկայացնելու համար HK-ն  համագործակցել է Հակոբ Հակոբյանի՝ Կանադայում բնակվող դստեր՝ Սիսի հետ:

1944-ին Բեյրութում ծնված Հովիկ Քյուրքջյանի HK արվեստի հավաքածուն ընդգրկում է 200-ից ավելի ստեղծագործություն, որոնց մեջ ընդգծված սեւեռում կա հայ նկարիչների ժառանգությանը: Քյուրքջյանը ժամանակին օժանդակել է Հայաստանի եւ Լիբանանի մշակութային, կրթական հաստատություններին, մանկատներին եւ ծերանոցներին: Նա ՀՀ մշակույթի նախարարության Ոսկե մեդալով է պարգեւատրվել՝ Երեւանում Սարոյանի արձանի տեղադրման առատաձեռն մասնակցության համար: Հավաքորդը նպատակ է ունեցել Բեռլինում հիմնելու իր ցուցասրահը (գալերին), հարթակ տրամադրելու հայաստանաբնակ եւ սփյուռքահայ նկարիչների համար: 2020-ին Հովիկ Քյուրքջյանը մահացել է, սակայն նրա տիկինը՝ Կարոլա Շիլդը, հետամուտ ամուսնու իղձերի կատարմանը, 2023-ին Բեռլինի արվեստի շաբաթվա ընթացքում ցուցադրում է HK հավաքածուից մի քանի նմուշ, արժանանում արվեստասեր այցելուների հավանությանը, քաջալերվում եւ նորից մասնակցում:

Քյուրքջյանի հավաքածուն արտացոլում է սփյուռքահայի հայացքն աշխարհին. Հայոց ցեղասպանության հետեւանքով աշխարհասփյուռ հայերի՝ մշակութային մեկուսացվածությունն ու ընկերային ինտեգրումը դրոշմված են HK հավաքածուն համալրող նկարիչների ստեղծած պատկերներում: Իսկ ՀՀ-ում ստեղծագործող հայ երիտասարդ արվեստագետների աշխատանքներն էլ ցուցիչն են 1991-ից ազատ, անկախ երկրի, եւ արտացոլում են նախկինում ԽՍՀՄ-ի օրոք պետականորեն հաստատված արվեստից դեպի արդի ժամանակակից սերնդի մտածողություն եւ արտահայտչամիջոցներ անցումը:

ԱՆԱՀԻՏ ՀՈՎՍԵՓՅԱՆ

Գերմանիա

Գլխավոր լուսանկարում՝ Հովիկ Քյուրքջյանը Ասատուրի հետ Բեյրութում՝ վերջինիս ցուցահանդեսի բացմանը: 2016 թվական