Քննադատություն Արեւմուտքին Իրանից՝ երեխաների իրավունքների հարցում 

Օրերս տեղի է ունեցել սոցիալական դժվարին պայմաններից տուժած երեխաների ու պատանիների աջակցության առաջին ազգային համաժողովը, որի ընթացքում Իրանի ներքին գործերի նախարար Ահմադ Վահիդին քննադատել է Արեւմուտքին՝ երեխաների իրավունքների հարցում վարած նենգ ու խայտառակ քաղաքականության համար, նշելով, որ աֆղան, սիրիացի եւ եմենցի երեխաները ենթարկվել են ճնշումների, սակայն արեւմտյան կառավարությունները որեւէ կերպ չեն պաշտպանել նրանց իրավունքները:

Ըստ իրանցի պաշտոնյայի, արեւմտյան երկրների դիրքորոշումները ներկայացված են երեխաների իրավունքների կոնվենցիայի տեսքով, որը բավարար ուշադրություն չի դարձնում երեխայի բարոյական խնդիրներին եւ զարգացմանը:

Հիրավի, բարձրացնելով այդ զգայուն հարցը՝ իրանական կողմը շեշտը դնում է երեխայի դաստիարակչության եւ ընդհանրապես բարոյական արժեքների սերմանման վրա, որն ավելի քան կարեւոր է մարդու՝ որպես սոցիալական էակի ձեւավորման ու զարգացման համար: Սակայն նշվածից բացի, իրանական կողմը զուգահեռ բարձրացնում է եւս մեկ կարեւոր մարդասիրական հարց, այն է՝ փորձում է ներգաղթյալ երեխաների համար ապահովել կրթություն ստանալու հնարավորությունը:

Վերոնշյալի համատեքստում հետաքրքրական է, որ Վենեսուելայի նախագահ Նիկոլաս Մադուրոյի կինը՝ Կիլիա Ֆլորեսը, Թեհրանում հանդիպելով մի խումբ իրանցի կին իրավապաշտպանների, Կանանց եւ ընտանիքի հարցերով փոխնախագահ Էնսիեհ Խազալիի հետ, խոսել է ԱՄՆ պատժամիջոցների եւ ճնշումների դեմ Վենեսուելայի ժողովրդի դիմադրության մասին՝ նշելով, որ դիմադրությունն առաջընթացի միակ ճանապարհն է:

Իրանի իսլամական խորհրդարանի Ազգային անվտանգության եւ արտաքին քաղաքականության հանձնաժողովի ղեկավար Վահիդ Ջալալզադեն էլ հայտարարել է, որ ԱՄՆ-ն մարդու իրավունքների պաշտպանության իր քաղաքականությամբ վնասել է տասնյակ միլիոնավոր մարդկանց: Ըստ նրա, մոտ 85 միլիոն մարդ ամբողջ աշխարհում տուժել է ԱՄՆ օրենքներից, իսկ միլիոնավոր մարդիկ տեղահանվել են Աֆղանստանում: Ուշագրավ է, որ ԱՄՆ-ի բնակչությունը կազմում է աշխարհի ընդհանուր բնակչության 5 %-ը, սակայն աշխարհի բանտարկյալների 25 %-ը գտնվում է ԱՄՆ բանտերում: Ավելին, Ջալալզադեն ընդգծել է, որ Իրանի հիվանդներին դեղորայքի ժամանակին չմատակարարումը եւ նրանց կորուստն Իրանում՝ ԱՄՆ պատժամիջոցների կողմից մարդու իրավունքների խախտման դեպքերից են:

Այսպիսով, Թեհրանը հանդես է գալիս ոչ միայն Իրանի, այլ նաեւ տարածաշրջանի այլ ժողովուրդների, հատկապես՝ Արեւմուտքի կողմից այնքան հաճախ թմբկահարված կանանց եւ երեխաների ոտնահարված իրավունքների վերականգնման դիրքերից՝ ձեռնոց նետելով միջազգային իրավապաշտպան կազմակերպություններին ու կառույցներին, ինչպես նաեւ իրավական մտքին առհասարակ:

ԿԱՐԵՆ ՄԿՐՏՉՅԱՆ

Իրանագետ