Ուղիղ մեկ տարի առաջ վարչապետ Նիկոլ Փաշինյանն Արցախյան հարցի մասին հերթական անակնկալ ու անսպասելի հայտարարությունն արեց՝ ասելով. «Այսօր միջազգային հանրությունը մեզ կրկին ասում է՝ մի փոքր իջեցրեք Լեռնային Ղարաբաղի կարգավիճակի հարցում ձեր նշաձողը եւ միջազգային մեծ կոնսոլիդացիա կապահովեք Հայաստանի եւ Արցախի շուրջ»:
Փաշինյանը նշել էր, որ իր կաբինետի մոտեցումն այս հարցի մասով այժմ փոխվել է. եթե մինչ այդ կարեւորվում էր Արցախի կարգավիճակը, ապա այժմ առաջին պլան է մղվում Արցախի անվտանգության եւ ժողովրդի իրավունքների հարցը, ինչից էլ պետք է բխի կարգավիճակը: Ադրբեջանագետ, Ազգային ժողովի նախկին պատգամավոր Տաթեւիկ Հայրապետյանի համոզմամբ՝ չարաբաստիկ այս հայտարարությունից հետո ՀՀ իշխանություններն այլեւս որեւէ խոսք չէին ասում Արցախի ժողովրդի ինքնորոշման իրավունքի մասին:
«Այսինքն՝ Ալիեւին ցույց տվեցին, որ ագրեսիայի ու պատերազմի արդյունքում պատրաստ են հրաժարվել մեր ժողովրդի ու պետության համար կենսական իրավունքներից: Մեկ տարվա ընթացքում Ադրբեջանը ոչ միայն նոր սադրանքներ հրահրեց Արցախի, այլեւ լայնամասշտաբ ագրեսիա իրականացրեց Հայաստանի նկատմամբ: Բայց, չգիտես ինչու, խոստացված բացառիկ միջազգային կոնսոլիդացիան հայտարարությունների ու կոչերի տեսքով միայն արտահայտվեց, որոնք Ադրբեջանը արհամարհում է: Արցախի հարցում նշաձողի իջեցնումից մեկ տարի անց մենք ունենք փակված Լաչինի միջանցք, Արցախի մեր հայրենակիցներին ընդամենը մինիմալ քանակի սնունդ է հասնում ռուս խաղաղապահների ու Կարմիր Խաչի միջոցով: 120. 000 մարդ, նրանցից 30.000 երեխա փաստացի գերության մեջ է՝ էթնիկ զտման կամ տեղահանման լուրջ սպառնալիքի տակ: Ո՞ւր է խոստացված միջազգային բացառիկ կոնսոլիդացիան: Իհարկե չկա ու չի լինի, քանի որ չի լինում կոնսոլիդացիա այն պետությունների շուրջը, որոնց ղեկավարները հրաժարվում են սպասարկել իրենց երկրի ու քաղաքացիների կենսական շահերը, ագեսիայի ու ճնշման ներքո հրաժարվում են ամենակարեւոր անվտանգային հարցերից, չունեն կարմիր գծեր եւ տեսլական, հակասական են ու անկայուն»,- ասում է Հայրապետյանը:
Նա այն համոզմանն է, որ թույլերին ընդհանրապես չեն օգնում, պայքարողներին են ձեռք մեկնում: Ադրբեջանագետը վստահ է՝ նշաձողի իջեցման մասին հայտարարությամբ՝ Փաշինյանը ոչ միայն հրաժարվեց իր իսկ նախընտրական ծրագրից ու կառավարության ծրագրից, որտեղ ամրագրված էր, որ պայքարելու են Արցախի ինքնորոշման իրավունքի համար, այլեւ շատ ավելի խոցելի դարձրեց ՀՀ-ն, իսկ Արցախն ուղղակի դրեց գոյութենական վտանգի տակ:
ՍԵՎԱԿ ՎԱՐԴՈՒՄՅԱՆ
