Աշխատարան ԺԱԻ-ում

Դեկտեմբերի 9-ից 10-ը Երեւանի Ժամանակակից արվեստի ինստիտուտում (ԺԱԻ) տեղի ունեցավ «Գաղափարների նախագծում. միջգիտակարգային եւ ընդլայնված կուրատորական մոտեցումներ» խորագրով երկօրյա դասընթաց: Դասընթացը վարում էին Վրաստանից ժամանած երկու կուրատորներ՝ Ալեքսի Սոսելիան եւ Գրիգորի Սպանդերաշվիլին: Դասընթացին հրավիրված էին աշխատակիցներ տարբեր թանգարաններից (Մատենադարանից, Ժամանակակից արվեստի, Պատմության, Էրեբունու եւ Կոմիտասի թանգարաններից):

Առաջին օրը համադրողները պատմեցին Վրաստանում արված իրենց գործունեության, կազմակերպած եւ իրականացրած նախագծերի, ինչպես նաեւ կուրատորական գործի հիմքերի ու ներկայումս առկա խնդիրների մասին:

Երկրորդ օրը հանդիպման մասնակիցները ներկայացան իրենց գաղափարներով, հարցերով ու դեռեւս պատրաստման փուլում գտնվող նախագծերով: Նրանք քննարկեցին հնչեցրած գաղափարներն ու հարցերը, առաջարկեցին լուծումներ ու տվեցին իրենց խորհրդատվությունը:

Հանդիպման վերջում նրանք ներկայացրին ԺԱԻ-ում օրեր առաջ տեղի ունեցած «Ցուցահանդեսի բացում չկա» հանդիպումը: Հանդիպումը հնարավորություն էր տալիս Երեւանի երիտասարդությանը հավաքվել մի ընդհանուր հարկի տակ ու քննարկել իրենց հուզող հարցերն ու խնդիրները:

Հանդիպմանը մասնակցում էին՝ Արեգ Բալայանը՝ լուսանկարիչ, վավերագրող, տեսողական արտիստ (Հայաստան), Թիմոթի Մաքսիմենկոն՝ հնչյունային արվեստագետ (Ուկրաինա), տեխնո ոճի երաժիշտներ Երեւանից եւ վերոհիշյալ երկու համադրողները: Այս նախագծերն անց են կացվում «Ինչպես է մեդիան ձեւավորում իրականությունը» արվեստի կացարանի շրջանակում:

Նախագիծը ֆինանսավորել է Գերմանիայի դաշնային արտաքին գործերի նախարարությունը եւ Գյոթե ինստիտուտի «Մշակույթի եւ կրթության կայունացման ծրագիրը»:

ՀՐԱՉՅԱ ԳԱԼՍՏՅԱՆ