«Իմ ժամանակի մեծերը». ցուցահանդես Թեքեյան կենտրոնում

Թեքեյան կենտրոնի ցուցասրահում բացվեց Հայաստանի ժողովրդական նկարիչ Անատոլի Ավետյանի՝ «Իմ ժամանակի մեծերը» խորագրով դիմանկարների ցուցադրությունը: Այն կազմակերպվել էր Անատոլի Ավետյանի հոբելյանի՝ 70-ամյակի շրջանակներում՝ Հայաստանի Թեքեյան մշակութային միության նախաձեռնությամբ:

Ցուցահանդեսի բացմանը ներկա էր ԿԳՄՍ նախարար Վահրամ Դումանյանը, Հայաստանի նկարիչների միության նախագահ Սուրեն Սաֆարյանը, նկարիչներ, արվեստասեր հանրություն:

Ներկայացված է 30 աշխատանք, որոնք հեղինակի 2022 թվականի ստեղծագործություններն են: Դիմանկարների շարքում ներկայացվում են նկարչի ժամանակակիցները, երեւելի հայեր, որոնցից մի քանիսի հետ Անատոլի Ավետյանը հանդիպել է իր կյանքի տարբեր փուլերում: Սա բացառիկ ցուցադրություն է եւ արվեստասեր հանրությանն է ներկայացվում առաջին անգամ:

Ցուցադրված են Մարտիրոս Սարյանի, Մինաս Ավետիսյանի, Շառլ Ազնավուրի Հարություն Կալենցի, Առնո Բաբաջանյանի, Վիկտոր Համբարձումյանի, Սերգեյ Փարաջանովի, Տիգրան Պետրոսյանի, Պարույր Սեւակի, Վազգեն Առաջինի, Սերգեյ Դովլաթովի, Հրանտ Մաթեւոսյանի, Հովհաննես Բաղրամյանի, Լուսինե Զաքարյանի եւ այլոց դիմանկարները: Հեղինակը վստահեցնում է՝ ծնվել է մի ժամանակաշրջանում, երբ ներկայացված մեծանուն հայերը մեծ ճանաչում ունեին ոչ միայն մեր երկրում, այլեւ նրա սահմաններից դորս՝ ամենատարբեր ոլորտներում:

Հայաստանի Թեքեյան մշակութային միության նախագահ Ռուբեն Միրզախանյանը բարձր գնահատեց նկարչի՝ մշտապես հետաքրքրություն առաջացնող ցուցադրությունները եւ հավելեց, որ նրա արվեստը վաղուց հայտնի է մշակութասեր հանրությանը ինչպես թանգարաններում մշտական ցուցադրությամբ, այնպես էլ մասնավոր հավաքածուներում: «Այս ցուցադրությունն առանձնանում է հատկապես իր կրթական նշանակությամբ. ներկայացված են 20-րդ դարի այն մեծերը, որոնք նշանավորում են հայի մեծությունը տարբեր ասպարեզներում»,-նշեց Ռուբեն Միրզախանյանն ու շնորհավորեց ցուցահանդեսի բացման առթիվ:

Հայաստանի նկարիչների միության նախագահ Սուրեն Սաֆարյանը եւս շնորհավորեց նկարչին հերթական հետաքրքրական ցուցադրության բացման առթիվ եւ վստահեցրեց՝ զարմացած եւ հիացած է Անատոլի Ավետյանի աշխատասիրությամբ: Նշենք, որ ցուցադրությունը բաց կլինի մինչեւ դեկտեմբերի 16-ը:

Հայաստանի Թեքեյան մշակութային միության լրատվական գրասենյակ