Բաքվումՙ գերի, Երեւանումՙ կալանավոր:Բաքվի գերությունից ազատված եւ հայրենիք վերադարձած զինվորներին, պարզվեց, սպասում են բանտային ճաղեր Հայաստանում:
Հայրենիք վերադարձած տասը գերիներից հինգին ՔԿ-ն մեղադրում է Քրեական օրենսգրքի 365 հոդվածի 3-րդ մասովՙ մարտական հերթապահություն կամ մարտական ծառայություն կրելու կանոնները խախտելու համար, որն առաջացրել է ծանր հետեւանքներ: Քննչական կոմիտեի միջնորդությամբ հինգից երկուսին կալանավորել են, մեկն ազատ է արձակվել, վերջին երկուսի մասին տեղեկություններ դեռ հայտնի չեն:
Հիշեցնենքՙ այս զինծառայողները գերեվարվել էին այս տարվա նոյեմբերի 16-ինՙ Սյունիքի եւ Վայոց ձորի սահմանագոտում ծավալված արյունալի մարտերի օրը: Այդ օրը հայկական կողմը երկու դիրք էր կորցրել:
Գերությունից վերադարձածներին դատում են քաղաքական ղեկավարության ցուցումով, պնդում է տասնամյակներ շարունակ զինվորների խնդիրներով զբաղվող իրավապաշտպան Ժաննա Ալեքսանյանը: Գերիներին դասալիք համարող իշխանությունը նրանց ցմահ ազատազրկման կարող է դատապարտել:
ԱԺ նախագահ Ալեն Սիմոնյանը իր համոզմունքն է հայտնում, թե գերիներն իր համար չկան, նրանց պատճառով չպետք է Սյունիքը կորցնենք, կան սպաներ ու զինվորներ, որոնք իրենց պարտականությունը չեն կատարել եւ հայտնվել են գերության մեջ, ՀՀ սահմանները պաշտպանելու փոխարեն նախընտրել են հանձնվել:
Բանակն ու հայ զինվորին արժեզրկելուց հետո 90 մլն դրամ արժողությամբ նոր մեքանայով պտտվող Ալեն Սիմոնյանը հանդգնում է կասկածի տակ դնել գերեվարված հայ զինվորին հայրենասիրությունը:
«Ո՞վ է դասալիք, դո՞ւք, թե՞ տղաները: Բարձրաստիճան պաշտոնյան ասի դասալիք են, մեզ պետք չեն,միջազգային ատյանները բա ինչ պիտի ասեն,պիտի ասենՙ եթե քո երկիրը քեզ չի ընդունում, մենք ինչի ենք պայքարում քեզ հետ բերելու համար»,-ասում է նախկին գերի Կ. Մանուկյանի հայրը:
Մանուկյանը հիշում է իրենց հանդիպման ժամանակ Փաշինյանի խոսքերը, որտեղ նա նշել էր, որ գերիների ծնողներից մի փոքր է քիչ մտածում իրենց զավակների մասին, բարկությունը զսպում ու ասում. «Նա ամենքից շատ պիտի մտածեր, ոչ թե մեզանից քիչ»:
Նախկին գերու հայրը գերիների իր ցուցակն ունի, ամեն մեկի տունդարձից հետո նշում է անում նրանց անունների դիմաց եւ ասում է, որ գերիների, նաեւ իր որդու վերադարձը, իշխանության հաղթանակը չէ:
Նախընտրական քարոզարշավի ժամանակահատվածում, երբ Փաշինյանին խիստ անհրաժեշտ էր քաղաքացիների աջակցությունը, նա Բաքվում պահվող գերիների մասին դրական էր արտահայտվում եւ փորձագիտական շրջանակների համար տարակուսանք առաջացնող հայտարարություններ անում:
«Այդ տղաները Բաքվի բանտերում պայքարում են Հայաստանի անկախության համար, ինքնիշխանության համար, եւ նրանք մեզ կներեն մեկ-երկու ամիսներ ավելի մնալու համար, բայց իրենք մեզ չեն ների, եթե մենք զիջենք մեր երկրի անկախությունն ու ինքնիշխանությունը»,- ասում էր Փաշինյանը:
Իսկ այս զինծառայողների գերեվարման հենց հաջորդ օրն էր ասել, որ անհրաժեշտություն կա պարզելՙ ի՞նչ հանգամանքերում են նրանք գերեվարվել:Փաշինյանի ելույթից հետո գերիները Բաքվի բանտերում երկու, ամիսից ավել են պահվում: Կներե՞ն նրանք մեզ ու Փաշինյանին:
Արդյոք միջազգային հանրությունը, մարդասիրական այսօրինակ խնդրի վերաբերյալ Հայաստանի առաջին դեմքերի վերաբերմունքը տեսնելով, անհետեւողականություն չի՞ դրսեւորի:
Ու՞ր է տանում այս երկիրը պողպատե մանդատակիր իշխանությունը,նախ ինքն իրեն, հետոՙ բոլորիս, հարց է տալիս իրեն Մանուկյանը,ու ներողություն խնդրում գերիներից բոլորի անունից:
