Լույս է տեսել Տիգրան Պետրոսյանցի «Հայրենիքի համար» (կենսա-մատենագիտական հանրագիտարան) գիրքը 212 էջ ծավալով:Այն նվիրված է Հայաստանի անկախության վերակերտման համար Արցախյան պատերազմի մասնակից Խաչատուր Աբովյանի անվան հայկական պետական մանկավարժական համալսարանականներին:
Հարկ է նշել, որ Արցախյան երեք պատերազմներին գործուն մասնակցություն են ունեցել համալսարանի երեք հարյուրից ավելի շրջանավարտներ եւ ուսանողներ: Անհավասար մարտերում հերոսաբար զոհվեցին 52 մանկավարժականցիներ: Նրանց հիշատակը հավերժացնելու համար 2000թ. համալսարանի Խանջյան փողոցի վրա գտնվող մասնաշենքի բակում կանգնեցվել է խաչքար-հուշակոթող: Արցախյան երրորդ պատերազմից հետո բանասիրական ֆակուլտետի շենքի պուրակում կանգնեցվեց հուշարձան-կոթող, որի կենտրոնական կերպարը 1602 թվականին Արցախի Ծիծեռնակավանքում կերտված խաչքարն է:
Գրքից տեղեկանում ենք նաեւ, որ 2020թ. Արցախյան պատերազմի ընթացքում հարյուրավոր ուսանողներ մասնակցում էին կամավորական աշխատանքների`տեղահանված արցախցիների տեղավորման, սնունդով եւ հագուստով ապահովման եւ աջակցության այլ ծրագրերի համար:
– «Բայց ուժերն անհավասար էին:Հայերի դեմ կռվում էին ոչ թե ադրբեջանի,այլ հիմնականում թուրքական սպաների մարզած հատուկ պատրաստության զորամիավորումներ, տարբեր երկրներում հավաքագրված վարձկաններ, երրորդ երկրներից ներկրված ամենաարդիական զինատեսակներ, քիմիական ու ֆոսֆորային զենք»,- գրում է դոկտոր-պրոֆեսոր Ռուբեն Միրզախանյանը :
Համալսարանի հերոսներին է նվիրված գիրք-հանրագիտարանը, որտեղ զետեղված են նրանց կենսագրականները լուսանկարներով:
Գրքի տպաքանակը` 400 օրինակ: Այն պատմագիտական արժեք ունի եւ կարդացվում է սրտի թիթիռով:
