Մեր քաղաքում կան այնպիսի անհասցե վայրեր, որոնք գլոբալ տեղորոշման համակարգերի օգնությամբ անգամ հնարավոր չէ ցույց տալ քարտեզի վրա: Օրինակ, երբ ուզում ես մեկին մոլորության մեջ գցել, կամ ուշադրությունը շեղել, ուղարկում ես մի անորոշ հասցեով, որը կոչվում է «ՊԵՉԵՆՈՒ ԲԱՂԵՐ»:
Մեզ մոտ «ՍԱՏԱՆԱ» մականունով թաղային հեղինակության տիրությում գտնվող մի թաղամաս էլ կա, որտեղ խորամանկություն, կամ, առավել եւս, քյանդրբազություն անելը խիստ արգելված է: Հաստատ կռահեցիք, որ այդ անհասցե թաղամասը կոչվում է «ՍԱՏԱՆԻ ՄԱՅԼԱ»:
Կադաստրային քարտեզագրման չի ենթարկվել, հետեւաբար նաեւ անհասցե է այն վայրը, ուր սովորաբար ոչ ոք չի ցանկանում հայտնվել: Բայց երբեմն ստիպված ես լինում քեզ համար ոչ ցանկալի մարդկանց ուղարկել այն վայրը, որի վրա փակցված ցուցանակին գլխատառերով գրված էՙ «ՋԱՆԴԱՄԻ ԳՅՈՌ» բառակապակցությունը:
Անցանկալի մարդկանց խռիկ տալու մեկ այլ վայր էլ կա, որը կապ չունի Բաղրամյան -3 հասցեում գտնվող Գրողների միության հետ: Բայցեւայնպես, այդ անպաճույճ վայրը կոչվում է «ԳՐՈՂԻ ԾՈՑ»: Քանի որ Գրողների միությանը չանդամակցող այդ «ստեղծագործողը», ըստ հայկական հավատամքի, մարդու արարքները ողջ կյանքի ընթացքում գրի առնող երեւակայական ոգին է:
Մեր քաղաքում կա նաեւ սուպերմարկետից ավելի պարզունակ տեսքով մի հաստատություն, որը կոչվում է «ՀՈՐ ԴՈՒՔՅԱՆ»: Բնականաբար, այդ դուքյանից ուզածդ ապրանքը կարող ես վերցնել ու հեռանալ: Այս հաստատությունն էլ տեղորոշված չէ գլոբալ համակարգերի, ասել է թե` GPS-ի միջոցով:
Գրեթե «հոր դուքյանի» դերն է կատարում «ԲՈՅԱԽԱՆԻ ԿԱՐԱՍ» կոչված այն վայրը, որը հին երեւանցիներին ծանոթ բոյախչիների (ներկարարներ) թաղամասում էր գտնվում:
Կադաստրային քարտեզների վրա նշված չէ նաեւ այն վայրը, որտեղ մարդիկ կարող են կտրվել առօրյա հոգսերից ու անվրդով վայելել իրենց հանգիստը: Իսկ դա «ԷՇԻ ԱԿԱՆՋՆ» է, որտեղ քուն մտած անձի պետքը չէ, թե ի՞նչ է կատարվում աշխարհում: Կա նաեւ «ՈՒՂՏԻ ԱԿԱՆՋԻ» մեջ քնելու հանձնարարելի տարբերակը, սակայն մեզ մոտ ավելի հեշտ է ավանակ գտնել, քանՙ սապատավոր կենդանի:
Շատ ավելի պրակտիկ նշանակություն ունի անհասցե վայրերի շարքում գտնվող այն ապահով անկյունը, որտեղ մուտք գործելու համար երբեմն ստիպված ես վճարել անգամ 1000 թուման (օրվա սակագնով): Իսկ դա «ՄԿԱՆ ԾԱԿ» կոչված հայտնի ապաստանն է:
Եվ վերջապես, կա բոլորիս հայտնի մի վայր, որտեղ դու կարող ես հայտնվել երանության մեջ եւ չունենալ առօրյա հոգեմաշ ու տառապալի տեղեկատվությունը լսելու պարտադրանքը: Իսկ դա «ՄՈՐ ՓՈՐՆ» է:
