Հայաստանի Թեքեյան մշակութային միությունը հայտարարում է 2019-2020 թվականների ստեղծագործությունների մրցույթ: Այն կանցկացվի 6 անվանակարգում` գրականություն, կերպարվեստ, թատերական արվեստ, Հայագիտություն, Լրագրություն եւ Գեղարվեստական լուսանկարչություն:
Այսօր Թեքեյան մշակութային միությունում կայացած մամլո ասուլիսի ընթացքում Հայաստանի Թեքեյան մշակութային միության նախագահ Ռուբեն Միրզախանյանը ներկայացրեց մրցանակաբաշխության անցկացման կարգն ու սկզբունքները` կարեւորելով մշակույթի ոլորտում նման մրցանակաբաշխությունների անցկացումը:
Յուրաքանչյուր անվանակարգում հաղթողը կստանա դրամական պարգեւ` 1500 ԱՄՆ դոլար: Ստեղծագործությունները գնահատելու է մասնագիտական հեղինակավոր ժյուրին` նախապատվությունն առաջին հերթին տալով աշխատանքների որակին: Գեղարվեստական լուսանկարչություն եւ Կերպարվեստ անվանակարգերում ներկայացված ստեղծագործությունների համար կկազմակերպվի առանձին ցուցադրություն: Մրցույթին կարող են մասնակցել ինչպես Հայաստանից, այնպես էլ նրա սահմաններից դուրս` առանց տարիքային սահմափակման:
Մրցույթին մասնակցել ցանկացողները 2019-2020 թվականներին իրենց հեղինակած աշխատանքները կարող են ներկայացնել օգոստոսի 20-ից մինչեւ սեպտեմբերի 20-ը Հայաստանի Թեքեյան մշակութային միության գրասենյակ ամեն օր` բացի շաբաթ եւ կիրակի օրերից` ժամը 11:00-16:00-ն (հասցե` Երեւան, Խանջյան 50, 2-րդ հարկ, հեռ. ` 010 552 632, 010 520 783):
Ռուբեն Միրզախանյանն ընդգծեց, որ մշակութային մրցանակաբաշխությունների մեջ Թեքեյան մրցանակաբաշխությունն իր ուրույն տեղն ունի եւ անցկացվում է արդեն 27-րդ անգամ: Միության նախագահը հավելեց նաեւ, որ այս ընթացքում Թեքեյան մրցանակակիրներ եղել են ինչպես մշակույթի ոլորտում անվանի, այնպես էլ նորահայտ հեղինակներ:
