ՀԱՍՄԻԿ ԱՎԵՏԻՍՅԱՆ, ՀՊՄՀ լրագրության 3-րդ կուրս
Աշխարհի տարբեր թանգարաններում ամեն անգամ կտավից կտոր տեղափոխված արվեստի գործ տեսնելիս` Արեւիկ Առաքելյանը հիանում եւ երազում էր դրանց փոխարեն հայկական արվեստը տեսնելու մասին: Մանկուց կերպարվեստի հանդեպ ունեցած սերն ու նորաձեւության հանդեպ աճող հետաքրքրությունը գումարվելով` տարիներ անց ծնունդ տվեցին «Արտույտ» ապրանքանիշին:
«Շատ էի ուզում, որ ապրանքանիշի անվան մեջ լինի «art» (արվեստ – խմբ.) բառը եւ այն անպայման հայկական լինի: Երկար չմտածելովՙ հորինեցինք անունըՙ «Արտույտ»: Այժմ մեր մետաքսե թռչունն իր թեւերի վրա հայկական մշակույթ է աշխարհում տարածում»,- մեզ հետ զրույցում պատմեց Արեւիկը:
«Արտույտ» ապրանքանիշը հիմնադրվել է 2016թ. հոկտեմբերինՙ նպատակ ունենալով ճանաչելի դարձնել հայկական ձեռագործ արվեստը Հայաստանում եւ Հայաստանից դուրս: Ընկերությունը համագործակցում է ժամանակակից նկարիչներ Միհրան Ավետիսյանի, Կարեն Սմբատյանի, Տաթեւ Ղամբարյանի, ինչպես նաեւ թանգարաններիՙ Մատենադարանի, Երվանդ Քոչարի եւ Սերգեյ Փարաջանովի թանգարանների հետ: Այսօր նա շարֆեր է մատակարարում նաեւ Հայ առաքելական եկեղեցուն, պետական մարմիններին, որոնք նվիրում են դրանք բարձրաստիճան հյուրերին:
«Առաջին շարֆը գնել է մայրիկս, ու կրում է մինչ օրս: Այն ինձ հիշեցնում է բոլոր խոչընդոտների մասին, որոնց բախվեցի, ինչպես եւ երջանկության այն պահերի մասին, որ ապրեցի մեծ ու փոքր հաջողություններից», ասում է գործարար կինը հավելելով,որ հայ նկարիչների կտավները գեղեցիկ կնոջ պարանոցինՙ չեն կարող անտարբեր թողնել արվեստի գիտակներին ու սիրահարներին:
Արվեստն ու նորաձեւությունը համադրած «Արտույտը» արդեն հասցրել է զարդարել մի շարք ճանաչված մարդկանց պարանոցը: Արեւիկի շարֆերից են կրում Անգելա Մերկելը, Քիմ Քարդաշյանն ու Հայաստանի հայտնի տիկնայք:
«Երբեք թեւաթափ չեմ եղել ու մեծ ջանքեր եմ գործադրել նպատակիս հասնելու համար: Հիմա կարող եմ հստակ ասել, որ աշխատանքս տվել է իր արդյունքը»,- ասում է նա:
Վերջերս գործարկված artuyt.com կայքում տեղադրված բոլոր նմուշները, հիմնադիր-տնօրենի խոսքով, կարող են առաքվել աշխարհի որեւէ կետ: Թեկուզ արտաքին շուկա դուրս գալու ավանդական եղանակը մի քանի երկրներում` Ավստրիա, Չեխիա եւ այլն, գործում է, բայց 21-րդ դարում օնլայն վաճառքն ավելի լայն հնարավորություններ է ընձեռում թե՛ վաճառողին, թե՛ գնորդին:
Հայկական «Արտույտ» բրենդն առաջարկում է փաթաթվել արվեստովՙ միաժամանակ զգալով նորաձեւության շունչը:
«Ազգ» շաբաթաթերթ
