ՆԺԴԵՀ ԲԱՀՐԱՄՅԱՆ (1946-2021)

5

Սան Խոսեում (Կալիֆոռնիա) մահացել է իրանական բալետի երբեմնի մենակատար Նժդեհ Բահրամյանը :

Բնիկ պարսկահայՙ նա ծնվել էր 1946-ի, հոկտեմբերին: Ուսանել է Լոնդոնի Թագավորական բալետի դպրոցում: Վերադառնալով Թեհրանՙ 1960-ականներից մինչեւ 1979-ը հանդես է եկել «Իրանական ազգային բալետում», կատարել գլխավոր դերեր մի շարք բեմադրություններում: 1958-ին հիմնված «Իրանական ազգային բալետ» խումբը մինչեւ իսլամական հեղափոխությունը (1978) ներկայացումներով հանդես է եկել Թեհրանի «Ռուդաքի» համերգասրահում: Բալետի խմբում այդ քսան տարիների ընթացքում աշխատել է մոտ 50 պարող, որոնց մեկ երրորդը եղել են իրանցիներ, մնացածըՙ հրավիրյալ արտիստներ Եվրոպայից եւ ԱՄՆ-ից: Պարողների մեջ բավական թիվ են կազմել իրանահայերը, որոնց թվում էին առանջատար պարողներ Լեւոն Նշանյանը, Երջանիկ Ջամբազյանը եւ Մերի Ափիքը (Մելիք-Ազարյան), ինչպես նաեւ Էվելին Բալասանյանը, Օֆելյա Ազարնիան, Նժդեհ Բահրամյանը եւ այլք:

1979-ից հետո հաստատվելով ԱՄՆ-ումՙ Բահարմյանը շարունակել է գործունեությունը պարի բնագավառում: Կինըՙ անգլուհի Ջորջինա Բահրամյան Քոլմանը, նույնպես եղել է իրանական բալետի խմբի մենակատարուհի: