Գերմանական «Welt am Sonntag» թերթը հարցազրույց է տպագրել երբեմնի թուրք խոշորագույն գոլ խփող, աշխարհի գավաթի մրցումներում ամենաշատ գոլերի հեղինակ Հաքան Շուքուրի հետ, որն արդեն քանի տարի է, ինչ ապրում է Մ. Նահանգներում: Թերթի համաձայն, քառասունութամյա նախկին ֆուտբոլիստը այժմ «Uber» ընկերությունում տաքսու վարորդ է աշխատում եւ գրքեր է վաճառումՙ ապրուստը հոգալու համար:
«Երբ Ամերիկա գաղթեցի, սկզբում Կալիֆոռնիայում սրճարան բացեցի, բայց նկատեցի, որ տարօրինակ մարդիկ են հաճախում, եւ փոխեցի գործս: Ես ոչինչ չունեմ այժմ: Էրդողանը խլել է ինձանից իմ ազատությունը, արտահայտվելու եւ աշխատելու իրավունքները: Թուրքիայում իմ բանկային հաշիվները սառեցված են, ունեցվածքս առգրավված», նշել է նա, ավելացնելով, որ խզումը կառավարության հետ սկսվել է 2008 թվից, որից հետո սպառնալիքների եւ կեղծ մեղադրանքների թիրախ է դարձել:
1992-2007 թվերին 51 գոլերի հեղինակ եւ 2011-ին Էրդողանի կուսակցությունից խորհրդարանի պատգամավոր դարձած նախկին հարձակվողին սկսել են հետապնդել իբր Ֆեթուլահ Գյուլենի հետ առնչություն ունենալու համար: 2017-ին թուրքական պետական լրատվամիջոցները նրան «Ֆեթուլահի ահաբեկչական կազմակերպության (FETO) անդամ» է բնութագրել, չնայած նա 2016-ի պետական հեղաշրջման փորձը դատապարտել էր: Նրան են վերագրել նաեւ Ամերիկայում 3 միլիոնանոց շենքում ապրելու եւ Սան Ֆրանցիսկոյի ամենահարուստ թաղամասերից մեկում գործարարությամբ զբաղվելու «հանցանքները», որ ինքը, բնականաբար, ժխտում է: «Ոչ ոք չի կարողանում բացատրել, թե ես ինչ դեր եմ խաղացել այդ ձախողված հեղաշրջման մեջ: Ես ոչ մի անօրինական բան չեմ կատարել: Ոչ ահաբեկիչ եմ, ոչ էլ դավաճան», պնդել է Հաքանը:
Առաջին անգամը չէ, նշել է թերթը, որ նախկին ֆուտբոլիստը շոշափել է այս թեման: 2018-ին նա «Նյու Յորք թայմսին» ասել էր. «Չնայած հետաքննող լրատվության միջոցով իմ մասին ստեղծված թյուր կարծիքին, ես սիրում եմ իմ երկիրը եւ իմ ժողովրդին»:
