Լոնդոնի «Բարբիկան կենտրոնի» դահլիճում հունվարի 14-ին հանդես կգա Հայաստանի պետական սիմֆոնիկ նվագախումբը: Գեղարվեստական ղեկավար Սերգեյ Սմբատյանի ղեկավարությամբ նվագախումբը կկատարի Ջոն (Ջիվան) Տեր-Թադեւոսյանի (1926-1988) Մ. Շոլոխովի «Մարդու ճակատագրի» ընթերցման հիման վրա 1959-ին գրած N2 սիմֆոնիայի եվրոպական երկար սպասված պրեմիերան, Ալեքսեյ Շորի Բարկարոլանՙ ջութակի եւ նվագախմբի համար, ինչպես նաեւ Մաքս Բրուխի ջութակի կոնցերտ N1-ը, մենակատար Մաքսիմ Վենգերովի ընկերակցությամբ:
Նվագախմբի կատարումը հազվագյուտ հնարավորություն է տալու բրիտանացիներին ծանոթանալու 32-ամյա խմբավարի բացառիկ ընդունակություններին: Նա արժանացել է Ֆրանսիայի մշակույթի նախարարության բարձրագույնՙ Արվեստների եւ գրականության կավալերի շքանշանին:
«Հուսով ենք, որ մեր առաջնաելույթը Մեծ Բրիտանիայում եւ մեր հետագա շրջագայությունը Եվրոպայում, Հայաստանից հույսի եւ լույսի նոր փարոս կհանդիսանա եւ նոր ճանապարհ ցույց կտա աշխարհի երկրներին», նշել է այս առթիվ նվագախմբի ղեկավարը:
Գերմանիայում եւ Ավստրիայում արդեն իսկ սկսված ելույթները կշարունակվեն Ռուսաստանում եւ Չեխիայումՙ կազմակերպությամբ «Մշակույթի պաշտպանության եվրոպական հիմնադրամի»:
