Լույս է տեսել «Տնտեսական հեղափոխության հիմնարար ուղենիշերը Հայաստանի Հանրապետությունում» գիտաժողովի նյութերն ամփոփող (ՀՀ ԳԱԱ Մ.Քոթանյանի անվան տնտեսագիտության ինստիտուտ: Երեւան, ՀՀ ԳԱԱ «Գիտություն» հրատարակչություն, 2019թ.- 352 էջ) գիրքը:
Ժողովածուն նվիրվում է թավշյա հեղափոխության միամյակին (2018-2019թթ.): Ժողովածուում զետեղված հոդվածները կարող են օգտակար եւ կիրառական լինել Հայաստանում իրականացվող տնտեսական հեղափախության գործընթացում: Գիրքը երաշխավորված է հրատարակության ՀՀ ԳԱԱ Մ.Քոթանյանի անվան տնտեսագիտության ինստիտուտի գիտական խորհրդի որոշմամբ: Ժողովածուի պատասխանատու խմբագիրն է ՀՀ ԳԱԱ թղթակից անդամ, տնտեսագիտության դոկտոր, պրոֆեսոր Վլադիմիր Հարությունյանը :
Գրքում տեղ են գտել բազմաթիվ հետաքրքրական եւ բովանդակալից հոդվածներ նվիրված մեր տնտեսության հետագա զարգացման խնդիրներին: Մասնավորապես, Ֆինանսական համակարգի կատարելագործման ուղինիշերը ՀՀ-ում, Հայաստանը «նոր տնտեսության» ճանապարհին. ռազմարդյունաբերություն, Հայաստանի ներդրումային միջավայրի բարեփոխման հեղափոխական մոդելը, Հայաստանի Հանրապետության հանքարդյունաբերությունը, մտորումներ, հանգույցներ, զբոսաշրջության զարգացման ուղենիշերը եւ այլն:
Հարկ է նշել, որ այս խնդրին էր նվիրված մայիսի 21-ին ՀՀ ԳԱԱ դահլիճում կայացած գիտաժողովը, որին իր մասնակցությունն էր բերել նաեւ ՀՀ Վարչապետ Նիկոլ Փաշինյանը, այլ պաշտոնական անձինք: Ն. Փաշինյանը եւ ելույթ ունեցողները բարձր գնահատեցին տնտեսագիտական նորարարական մոտեցումները մեր երկրում:
– Հասարակության պահանջն ավելին է, քան արձանագրված հաջողությունները: Բարեփոխումների եւ կենսամակարդակի հեղափոխական ազդեցության ակնկալիքն արդարացի է եւ օբյեկտիվ,- իր ելույթում նշեց ՀՀ ԳԱԱ Մ. Քոթանյանի անվան տնտեսագիտության ինստիտուտի տնօրեն, ՀՀ ԳԱԱ թղթակից անդամ, տնտեսագիտության դոկտոր, պրոֆեսոր Վ. Հարությունյանը:
Ի դեպ, Վ. Հարությունյանը մեծ ներդրում ունի գիտաժողովի կազմակերպման եւ անցկացման գործում: Գրքում ներկայացված նյութերը կարող են ազդակ հանդիսանալ մեր երկրի տնտեսության հետագա զարգացման գործում:
