Հայաստանի Հանրապետության ոստիկանությունը 08.01.2019 թ. տարածած հաղորդագրության մեջ պարզաբանումներ է տվել նույն օրը Կոտայքի մարզում զինակոչիկներ տեղափոխող ավտոբուսի վրա խուլիգանական հարձակման մասինՙ կից հայտնելով, որ ըստ ՀՀ Կառավարության 29.10.2018թ. 1337-Ն որոշմանՙ ոստիկանությունը պարտավոր է զորակոչիկների խմբերին ուղեկցելՙ մարզերից մինչեւ քաղաքային գծի ավարտը, իսկ մայրաքաղաքումՙ մինչեւ կենտրոնական հավաքակայան:
«Կոտայքի մարզի զորակոչիկներին տեղափոխող ավտոբուսը սահմանված կարգով ուղեկցվել է մինչեւ բնակավայրի ավարտը, այսինքն կարգի համաձայնՙ ոստիկանությունն այլեւս չէր կարող շարունակել ուղեկցումը մինչեւ հավաքակայան» , ասված է հաղորդագրության մեջ:
Թե ինչ ասել էՙ «ոստիկանությունն այլեւս չէր կարող…» , անկեղծ, անհասկանալի է: Խոսքը մարդկանց խմբի մասին է, ովքեր գնում էին հայենիքը պաշտպանելու, հիմա թող ամեն մարդ ինքն իրեն հարց տաՙ ոստիկանությունը կարո՞ղ էր, թե՞ՙ ոչ: Պատասխանը պետք է միանշանակ լինիՙ կարող էր, պարտավոր է եւ պետք է շարունակի կարող ու պարտավոր լինել, երբ խոսքը բանակին է վերաբերում:
