«ԴՈՎԼԱԹՈՎ» ՖԻԼՄԸՙ ԲԵՌԼԻՆԱԼԵԻ ԺՅՈՒՐԻԻ ԴԱՏԻՆ

ԱՆԱՀԻՏ ՀՈՎՍԵՓՅԱՆ, Գերմանիա

Փետրվարի 25-ին կավարտվի Բեռլինալեն, եւ հայտնի կդառնան Ոսկե, Արծաթ արջի դափնեկիրների անունները: Մինչ այդ ծանուցենք, որ փետրվարի 17- ին մրցութային ծրագրում ցուցադրվել է եւ ուշադրութան արժանացել Ալեքսեյ Գերման կրտսերի «Դովլաթով» ֆիլմը (Ռուսաստան, Լեհաստան, Սերբիա, 2018), որ պատմում է հայ եւ հրեա ծնողներից սերած գրողիՙ 1971-ի նոյեմբերին լենինգրադյան 6 օրերի մասին: Բրեժնեւյան տարիներՙ Գրողների միությունը հրաժարվում է նրան անդամագրել, հեղինակի գրքերից որեւէ մեկը մինչ 1989 թ. ԽՍՀՄ-ում լույս չի տեսել: 1978-ին ԱՄՆ տարագրված Դովլաթովը մահկանացուն կնքեց 48 տարեկանումՙ ինֆարկտից: Ֆիլմում ներկայացված է նաեւ Նոբելյան մրցանակակիր բանաստեղծ Իոսիֆ Բրոդսկին: «Անթույլատրելի է տաղանդներին, ճակատագրեր խորտակելը», ասել է 2015-ին Արծաթ արջի դափնեկիր ռեժիսոր Գերմանըՙ մամուլի ասուլիսի ժամանակ: