ԱԺ փոխխոսնակ Էդուարդ Շարմազանովը համաձայն չէ այն դիտարկմանը, թե կարեւոր պաշտոնների համար ՀՀԿ-ն դրսից է մարդ բերում: Նման ակնարկներ արվում են այդ թվումՙ ՀՀԿ-ի կողմից առաջադրված նախագահի թեկնածու` Մեծ Բրիտանիայում ՀՀ դեսպան Արմեն Սարգսյանի վերաբերյալ: «Ի՞նչ է նշանակում` դրսից, նա դրսից չէ: Արմեն Սարգսյանը Միացյալ Թագավորությունում ՀՀ դեսպանն է»,- ասել է Շարմազանովը:
Ըստ Շարմազանովի, ճիշտ չէ այդպես արտահայտվել Արմեն Սարգսյանի մասին, նաեւ արդարացի չէ: «Նա ՀՀ դիվանագետ է, նա դեսպան նշանակվել է նախագահ Սերժ Սարգսյանի հրամանագրով: Ի դեպ, նա այն եզակի գործիչներից է, որը երեք մեր նախագահների կողմից էլ նշանակվել է դեսպան, եւ խոսել նրա մասին, որ նա դրսից բերված մարդ է, արդարացի չէ: Արմեն Սարգսյանն իր քաղաքական ու գիտական կենսագրությամբ արժանի է լինել ՀՀ նախագահ: Առաջ չընկնենք, որովհետեւ նա դեռ պետք է համաձայնի»,- հավելել է Շարմազանովը:
Հռոմի պապն ընդդեմ ստի
Հռոմի պապը ուղերձ է նվիրել կեղծ (fake) լուրերին: Նրա խոսքովՙ պատմության մեջ առաջին կեղծ լուրը տարածել է օձը, որը Եդեմի պարտեզում համոզել է Եվային քաղել իմացության ծառի պտուղը:
«Կեղծ լուրերը ստեղծվում են մարդկանց մանիպուլյացիայի ենթարկելու նպատակով եւ տարածվում իշխանության ծարավից: Հաճախ դրանք հիմնված են նախապաշարմունքների վրա եւ հատուկ այնպես է արվում, որ դրանք դժվար տարբերվեն իսկական լուրերից: Կեղծ լուրերի ամենասարսափելի ազդեցությունն այն է, որ դրանց պատճառով մարդիկ թշնամիներ են դառնում», հայտարարել է Պապը:
Նրա կարծիքով, ստի դեմ լավագույն հակաթույնը մարդիկ են, որոնք պատրաստ են անկեղծ երկխոսության եւ պատասխանատու կերպով են վերաբերվում իրենց բառերին:
Քահանայապետը նաեւ նշել է, որ ինքը կցանկանար ազնիվ լրագրություն տեսնել, որը «դեմ է ստին, հռետորական կարգախոսներին եւ սենսացիոն վերնագրերին»:
