Դեկտեմբերի 13-ին ՀՀ ՊՆ վարչական համալիրում կայացել է Զինծառայողների ապահովագրության հիմնադրամի հոգաբարձուների խորհրդի հերթական նիստը, որի ընթացքում քննարկվել են հիմնադրամի 2018-ի բյուջեի նախագիծը, 2018-ի աշխատանքների ժամանակացույցը, ինչպես նաեւ ներկայացվել է «Հիմնադրամի դեսպաններ» ծրագրի նախագիծը: Նախագծով առաջարկվում է արտերկրի մեծաթիվ հայ համայնք ունեցող քաղաքներում ունենալ «հիմադրամի դեսպաններ», ովքեր կաշխատեն սփյուռքի կառույցների հետՙ առավել մանրամասն ներկայացնելով հիմնադրամի գործունեությունը:
Հոգաբարձուների խորհուրդը հաստատել է հիմնադրամի 2018 բյուջեն, որով նախատեսվում է ապահովել շուրջ 5.3 միլիարդ դրամի մուտք պարտադիր վճարներից, եւս 81 միլիոն դրամՙ կամավոր նվիրաբերություններից, եւ շուրջ 500 միլիոն դրամ եկամուտ էլ ստանալ հիմնադրամի ակտիվների կառավարումից:
Հիմնադրամի գործադիր տնօրեն, ՀՀ կենտրոնական բանկի իրավաբանական վարչության պետ Վարուժան Ավետիքյանը ներկայացրել է վերջին մեկ տարվա ընթացքում կատարված աշխատանքների հաշվետվությունը:
Ըստ այդմՙ դեկտեմբերի 13-ի դրությամբ հավաքագրված գումարները կազմել են 5.27 միլիարդ դրամՙ որպես պարտադիր վճարներ, 77 միլիոն դրամ կազմել են նվիրաբերությունները, կատարվել է շուրջ 360 միլիոն դրամի հատուցում:
