«Արաքս» ՓԲ ընկերության 80 տոկոս պետական բաժնեմասի մասնավորեցման մասին պետգույքի կառավարման վարչության ներկայացրած որոշման նախագծին անդրադառնալով, երեկ, կառավարության նիստի ժամանակ, վարչապետ Կարեն Կարապետյանը հարցրեց վարչության պետ Արման Սահակյանին , թե ինչո՞վ է զբաղվում այս ընկերությունը: Պատասխանն այն էր, որ այն գիտահետազոտական, փորձարարակոնստրուկտորական, նախագծային աշխատանքներ իրականացնող ընկերություն է, բայց 2000 թ.-ից ի վեր գործունեություն չի ծավալել: «Այս ընկերությունը 2000թ.-ից գործունեություն չի ծավալում եւ ունի 6 աշխատող: 2000 թ.-ից ձեռնակությունը գործունեություն չի ծավալում, ինչո՞ւ ենք 17 տարի սպասում», արձագանքեց վարչապետը, հանձնարարելով բոլոր նմանատիպ ընկերությունները գույքագրել:
Միաժամանակ, երեկ կառավարությունը հավանություն տվեց պետական գույքի մասնավորեցման նոր նախագծին: Դեռեւս չմասնավորեցված ընկերությունների մասին Կարեն Կարապետյանի հարցին պատասխանելով, պետգույքի կառավարման վարչության պետ Արման Սահակյանը տեղեկացրեց, որ շրջանառության մեջ է դրվել 2017- 2020 թթ. մասնավորեցման ծրագիրը. «Այն ամբողջությամբ նոր ծրագիր է, որում ընդգրկված է 42 ընկերություն, որոնցից 23-ը հինՙ 2006-2007-թթ. ծրագրերից են, 17ՙ նոր ընկերություններ են»:
Ո՞ր ոլորտներում է ներդրումներ կատարելու «Հայաստանի ներդրողների ակումբը»
Հայաստանի կառավարության եւ «Հայաստանի ներդրողների ակումբ» փակ ոչ հրապարակային պայմանագրային ներդրումային ֆոնդի միջեւ կստորագրվի ռազմավարական նշանակություն ունեցող ծրագրերի համատեղ իրականացման մասին փոխըմբռնման հուշագիր: Այդ մասին երեկ որոշում ընդունեց կառավարությունը: Նշվեց, որ այս տարի ֆոնդի կողմից կկատարվեն շուրջ 300 մլն դոլարի ներդրումներ: Ներդրումները կուղղվեն էներգետիկ, այդ թվում այլընտրանքային էներգիայի արտադրության ու էներգետիկ ենթակառուցվածքների, զբոսաշրջության, հանքարդյունաբերության, տեղեկատվական եւ հեռահաղորդակցության տեխնոլոգիաների (ՏՀՏ), մշակող արդյունաբերության ոլորտներ: Ֆոնդը կլինի ՀՀ կառավարության գործընկերը «պետություն-մասնավոր հատված» գործակցության իրականացման գործում, ներդրումային ծրագրերում կմասնակցի սեփական միջոցներով` կիսելով ռիսկերը, կդառնա արտաքին ներդրումների ներգրավման կատալիզատոր, բարենպաստ պայմաններ կստեղծի անհատ ներդրողների համար, կիրականացնի ռիսկերի հավասարակշռման գործառույթ, կապահովի ներդրումների դիվերսիֆիկացիաՙ նվազեցնելով ռիսկերը:
Կարեւորելով այս որոշումը, վարչապետ Կարեն Կարապետյանը նշեց. «Ֆոնդը ոչ միայն նպաստելու է ներդրումների ներգրավմանը, այլեւ բերելու է բիզնեսի նոր մշակույթ: Ֆոնդի անդամները բավականին ճանաչված, հաջողակ բիզնեսմեններ են, ունեն լայն շրջանակներ, բազմաթիվ գործընկերներ տարբեր երկրներում, եւ նրանք հանդիսանալու են կամուրջ մեր եւ այդ երկրների բիզնես համայնքի միջեւ»:
