Կառավարությունը երեկ մի քանի որոշումներ ընդունեց տարբեր նախարարությունների ենթակայության տակ գտնվող ՊՈԱԿ-ների վերակազմակերպման մասին: Մասնավորապես, միացվեցին «Իրավախախտում կատարած անձանց վերականգնողական կենտրոն» եւ «ՀՀ արդարադատության նախարարության իրավաբանական ինստիտուտ» ՊՈԱԿ-ները: Հետագայում նախատեսվում է, որ վերակազմակերպված ՊՈԱԿ-ը վերակազմավորվելու է հիմնադրամի, որին էլ կմիացվի «Աջակցություն դատապարտյալին» հիմնադրամը: Որոշման ընդունման արդյունքում մոտ 115 մլն դրամով պետբյուջեի ծախսեր կտնտեսվեն:
Վերակազմակերպվելու են «Հայաստանի ազգային գրադարան» եւ «Հայաստանի ազգային գրապալատ» ՊՈԱԿ-ները, որոնք ստեղծվել են մշակութային, տեղեկատվական, կրթական, հրատարակչական գործի մշակման, պահպանման գործունեություն իրականացնելու նպատակով եւ իրականացնում են նմանատիպ եւ նույնաբովանդակ գործառույթներ: «Երաժշտագիտական գրադարան» ՊՈԱԿ-ն նույնպես վերակազմակերպելու է միացվելով «Կոմիտասի թանգարան-ինստիտուտ» ՊՈԱԿ-ին: Կմիացվեն նաեւ «Հայաստանի ազգային պատկերասրահ» եւ «Ցուցահանդեսային կենտրոն» ՊՈԱԿ-ները, որոնք ստեղծվել են մշակութային, գիտական, կրթական գործունեություն իրականացնելու նպատակով եւ նրանց գործունեության տեսակները նույնպես համընկնում եւ կրկնվում են: Մեկ այլ որոշմամբ էլ, «Ագարակ» պատմամշակութային արգելոց» ՊՈԱԿ-ը միացման ձեւով կվերակազմակերպվի «Պատմամշակութային արգելոց թանգարանների եւ պատմական միջավայրի պահպանության ծառայություն» ՊՈԱԿ-իՙ ստեղծելով «Ագարակ» պատմամշակութային արգելոց:
