Նավթի համաշխարհային շուկայում տիրող դրամատիկ վիճակի կապակցությամբ Վենեսուելայի նավթի նախարար Էուլոգիո Դել Պինոն հայտարարել է, որ եթե OPEC-ը ոչինչ չձեռնարկի, ապա մեկ բարել նավթի գինը կարող է իջնել 25 դոլարի: Նախարարը նավթ արտահանողների շահերը պաշտպանելու համար առաջարկել է սահմանել հեղուկ վառելիքի «հավասարակշիռ գին», ըստ որի մեկ բարելի գինը պետք է լինի 88 դոլար: Մինչդեռ այժմ մեկ բարելը վաճառվում է 44 դոլարով:
Դել Պինոն հույս ունի, որ դեկտեմբերի 4-ին OPEC-ի ներկայացուցիչների հանդիպման ժամանակ կհաջողվի հասնել փոխզիջման, թեեւ խոշոր արտահանողներ Սաուդյան Արաբիան եւ Քաթարը նաեւ նավթի էժանացման ջատագովներ են:
OPEC-ում գների պատերազմ նախաձեռնողներըՙ սաուդցիները եւ քաթարցիները շարունակում են հնարավորինս էժան վաճառելու մարտավարությունը, որպեսզի նավթի շուկայում պահպանեն իրենց բաժինը: Վերջին 17 ամիսներին գլխավոր նավթարդյունահանողները պարբերաբար խախտել են քվոտան, որը կազմում է օրական 30 մլն բարել: Եվ սաՙ այն պայմաններում, երբ նավթի խոշորագույն ներմուծողների պահեստարանները արդեն լեփ-լեցուն են:
Ի դեպ, «թերթաքարային հեղափոխության» շնորհիվ նավթի շուկաներում բաժնետոմսերի վերահսկիչ փաթեթը պատկանում է ԱՄՆ-ին: Չնայած թերթաքարային նավթի համեմատաբար բարձր ինքնարժեքին, նա արագ տեմպերով ավելացնում է հեղուկ ածխաջրածինների արդյունահանումը: Մեկ տարում այն աճել է 16 տոկոսով եւ կազմում է օրական 11,6 մլն բարել: Այն տպավորությունն է ստեղծվում, որ ԱՄՆ-ը ձգտում է նավթի միջազգային շուկայից դուրս մղել իր մրցակիցներին (առաջին հերթին Սաուդյան Արաբիային եւ Ռուսաստանին), հընթացս այնտեղ առաջացնելով գների անկում: Հանուն այդ նպատակի ամերիկացիները պատրաստ են նույնիսկ զոհաբերել իրենց թերթաքարային ճյուղը:
