Ժամանակին, երբ արտերկիր մեկնելու անհրաժեշտություն էր լինում, առաջին մտահոգություններից մեկը հեռախոսակապի ապահովումն էր: Հայաստանյան բջջային կապի ռոումինգ ծառայությունից միայն շատ հարուստներն էին օգտվում, կամ էլ նրանք, ովքեր երբեք չեն վճարում արտասահմանից տուն ժամերով խոսակցությունների համար, քանի որ, ասենք` վճարում է պետությունը կամ էլ ինչ-որ մասնավոր ընկերություն:
Վերջին շրջանում բջջային կապի հայաստանցի սպառողներն էլ են երբեմն հաճելիորեն զարմանում, երբ այս կամ այն օպերատորի բաժանորդ լինելը բերում է ռոումինգի ցածր սակագների կամ էլ ընդհանրապես մուտքային զրո դրամ պայմանի: Իհարկե, այստեղ էլ կան ստորջրյա խութեր, սակայն ընդհանուր առմամբ` միտումը միանշանակ ողջունելի է: Արցախն էլ, ի շարս արտերկրի, ռոումինգի պարագայում նախկին ոչ բարենպաստ սակագների ֆոնին սկսել է տարբերվել:
Տարբերվելն էլ, պարզվում է, իր նրբություններն ու տարբերություններն ունի, որոնց առնչությամբ էլ Լեռնային Ղարաբաղ վերջերս այցելած երիտասարդների մի խումբ դժգոհություն արտահայտեց «Ազգին»: «ՎիվաՍել-ՄՏՍ»-ի բաժանորդները Արցախում արդեն երկու տարուց ավելին օգտվում են 45 դրամ/րոպե սակագնով այն պարագայում, երբ «ԱրմենՏել»-ի բաժանորդները թեեւ անցել են նույն սակագնին, սակայն Արցախում ռոումինգի անցնելիս որպես ակտիվացման վճար 200 դրամ են վճարում:
Պայմանները բավականին լավն են, եթե հաշվի առնենք, որ 45 դրամ սակագինը վերաբերում է ինչպես մուտքային, այնպես էլ դեպի Հայաստան ու Արցախում տեղական զանգերին: Միեւնույն ժամանակ դրամ/րոպե սակագնից օգտվում են նաեւ «Ղարաբաղ Տելեկոմ»-ի բաժանորդները Հայաստան այցելության ընթացքում, սակայն մի տարբերությամբՙ ռոումինգի ակտիվացման որեւէ վճար չի գանձվում:
«Ազգի» հարցմանն ի պատասխան «Ղարաբաղ Տելեկոմ»-ից տեղեկացրեցին, որ «ԱրմենՏել» ընկերության հետ բանակցությունների նպատակն է եղել ապահովել ռոումինգի ծառայությունների նույն պայմանները, որ երկու տարի է գործում են «ՎիվաՍել-ՄՏՍ»-ի ցանցում: Ըստ տեղեկությանՙ «Ղարաբաղ Տելեկոմի» բաժանորդները ռոումինգի միացումը կատարում են անվճար, իսկ «ԱրմենՏելի» կողմից ռոումինիգի ակտիվացման համար գանձվող 200 դրամ վճարի մասին հարցը «Ղարաբաղ Տելեկոմը» չմեկնաբանեց:
Թե ինչու է «ԱրմենՏել»-ը ռոումինգի ակտիվացման վճար գանձում, որից ընկերության բաժանորդները դժգոհում ենՙ «Ազգի» գրավոր հարցմանը «ԱրմենՏել» ընկերության հասարակայնության հետ կապերի ծառայությունից պատասխանեցին, որ «ԱրմենՏել» ՓԲԸ եւ «Ղարաբաղ Տելեկոմ» ՓԲԸ համաձայնությունը «վերաբերում է միայն մեկ րոպեի սակագնին`փոխհաշվարկի դեպքում, իսկ Ընկերություններից յուրաքանչյուրն ունի ծառայությունների մատուցման իր պայմանները եւ քաղաքականությունը»:
Հարցերին, թե արդյոք նախկինում Արցախում եղե՞լ է ռոումինգի ակտիվացման վճար, նաեւ ինչով է պայմանավորված ակտիվացման վճար մտցնելու անհրաժեշտությունը, ընկերությունից պատասխանել են. «Կցանկանայինք տեղեկացնել, որ այն գործում է միայն «Արցախ» ռոումինգ ծառայության դեպքում եւ որեւէ կապ չունի ԼՂՀ-ում ռոումինգի հետ»: Այդուհետեւ պարզաբանումն է, թե բաժանորդը կարող է միանալ ցանկացած այլ ռոումինգ ծառայութան եւ օգտվել ԼՂՀ-ում ռոումինգի բազային փաթեթներից:
«Ինչպես եւ նախկինում, «ԱրմենՏել»-ի բաժանորդների համար ռոումինգի ակտիվացումը հասանելի է աշխարհի 173 երկրների 404 օպերատորի ցանցերում: Բաժանորդը կարող է առանց ակտիվացման վարձի ակտիվացնել ռոումինգը եւ օգտվել ռոումինգի հիմնական ծառայություններից: Բաժանորդը նաեւ կարող է միանալ գործող ռոումինգ ծառայություններից ցանկացածին` ավելի ձեռնտու պայմաններով (որոշ ծառայությունների պարագայում միացման համար գանձվում է լրացուցիչ վճար)», տեղեկացնում են ընկերության հասարակայնության հետ կապերի ծառայությունից:
Փորձեցինք ճշգրտել, թե «ավելի ձեռնտու պայմաններով» արդյոք նշանակում է րոպեի համար 45 դրամից ավելի էժան սակագին, պարզվեց, որ` ոչ: 45 դրամն առաջարկվող բոլոր սակագներից ամենաէժանն է: Այսինքն, անկեղծ ասած, ստացվում է, որ «ԱրմենՏել»-ն ինչ-որ տարբերակով փորձում է մի քիչ ավելին աշխատել, քան սովորաբար կարելի է, այն էլ` ուրիշների համար:
Ընկերության պաշտոնական կայքի համաձայն, կան տարբեր ռոումինգ փաթեթներ, գերակշիռ մասի դեպքում ակտիվացման ոչ մի վճար չի գանձվում:
Իսկ դժգոհ հաճախորդները թերեւս մտածելու պատճառ ունեն…
