Աճի ցուցանիշն ամենաբարձրն է եղել ծառայությունների ոլորտում, իսկ շինարարությունում անկումը շարունակվել է
Հայաստանի ազգային վիճակագրական ծառայության հրապարակած 2014-ի հունվար-հոկտեմբեր ամիսների սոցիալ-տնտեսական ցուցանիշների համաձայն, Հայաստանի տնտեսական ակտիվության ցուցանիշը (ՏԱՑ) նախորդ տարվա նույն ժամանակահատվածի համեմատ աճել է 4,2 տոկոսով: Հոկտեմբերին սեպտեմբերի նկատմամբ արձանագրվել է 14,3 տոկոս անկում, իսկ նախորդ տարվա հոկտեմբերի նկատմամբ` 3,7 տոկոս աճ:
Հիշեցնենք, որ այս տարի պետական բյուջեի հիմքում դրված է 5,2 տոկոս տնտեսական աճի ցուցանիշը, Արժույթի միջազգային հիմնադրամը մեր երկրի համար կանխատեսում է 2,5 տոկոս տնտեսական աճ, Համաշխարհային բանկը եւ Վերակառուցման եւ զարգացման եվրոպական բանկը (ՎԶԵԲ) ` 3 տոկոս:
Աճի ցուցանիշն ըստ տնտեսության ճյուղերի
Հայաստանի տնտեսության բոլոր ճյուղերը (բացառությամբ շինարարության) այս տարվա հունվար-հոկտեմբեր ամիսներին աճ են արձանագրել` Ազգային վիճակագրական ծառայության հրապարակած 4,3 տոկոս տնտեսական ակտիվության աճի պարագայում: Ըստ տնտեսության ճյուղերի, պատկերը հետեւյալն է` արդյունաբերության արտադրանքի ծավալներն աճել են 2,2 տոկոսով, գյուղատնտեսությանը` 6,5 տոկոսով, ծառայություններինը` 7,2 տոկոսով, առեւտրինը` 4,7 տոկոսով, շինարարությունն արձանագրել է 4,4 տոկոս անկում:
Միայն հոկտեմբեր ամսին նախորդ տարվա հոկտեմբերի համեմատ, պատկերը համանման է: Արդյունաբերությունում աճը կազմել է 2,2 տոկոս, գյուղատնտեսությունում` 4,6 տոկոս, ծառայություններում` 10,4 տոկոս, առեւտրում` 4,7 տոկոս, շինարարությունն արձանագրել է 14,4 տոկոս անկում:
Ինչպես երեւում է, ամենաբարձր աճն արձանագրվել է ծառայություններում` 7,2 տոկոս: Գումարային առումով այս ճյուղի ծավալները հասել են 895 մլրդ դրամի (երրորդ ցուցանիշը առեւտրից եւ արդյունաբերությունից հետո): Ամենավատ ցուցանիշն ունի շինարարությունը` 4,4 տոկոս անկում, գումարային առումով ծավալներըՙ 287 մլրդ դրամ, ինչը 3-4 անգամ ցածր է 2007-2008-ին այս ճյուղում արձանագրված ցուցանիշից:
2014-ի առաջին 10 ամիսներին, նախորդ տարվա նույն ժամանակահատվածի համեմատ, արդյունաբերությունը 2,2 տոկոս աճ է արձանագրել, իսկ արտադրանքի ծավալները կազմել են 1 տրլն 40 մլրդ 100 մլն դրամ: Ընդ որում, սեպտեմբերի նկատմամբ արդյունաբերության ծավալներն աճել են 2,2 տոկոսով, անցյալ տարվա հոկտեմբերի նկատմամբ` 5,6 տոկոսով: Ավելացնենք, որ արդյունաբերական արտադրանքի ծավալը գումարային առումով 2-րդն է տնտեսության ճյուղերի մեջ, զիջելով միայն առեւտրի շրջանառության ծավալներին:
Արտահանում-ներմուծում` 1:3 հաշվեկշիռը պահպանվում է
Արտաքին առեւտրաշրջանառությունը 2014-ի հունվար-հոկտեմբերին 2013-ի նույն ժամանակահատվածի նկատմամբ ավելացել է 3,6 տոկոսով եւ կազմել 4 մլրդ 876 մլն դոլար: Արտահանումը կազմել է 1 մլրդ 250 մլն դոլար, արձանագրելով 2,9 տոկոս աճ, ներմուծումը կազմել է 3 մլրդ 626 մլն դոլար, աճելով 3,8 տոկոսով: Արտաքին առեւտրի բացասական հաշվեկշիռը այս տարվա հունվար-հոկտեմբերին կազմել է 2 մլրդ 376 մլն դոլար:
Միջին աշխատավարձը Հայաստանում 166 հազար դրամ է
Միջին ամսական աշխատավարձը Հայաստանում 2014-ի հունվար-հոկտեմբերի արդյունքներով, բարձրացել է 7,8 տոկոսով եւ կազմել 166 հազար դրամ, մասնավոր հատվածում` 195 հազար դրամ, աճելով 8 տոկոսով, պետականում` 145 հազար դրամ, աճելով 7,4 տոկոսով:
Միայն հոկտեմբեր ամսին միջին աշխատավարձը կազմել է 173 հազար դրամ, այդ թվում մասնավոր հատվածում` 199 հազար դրամ, պետականում` 154 հազար դրամ:
