Թուրքիայի վարչապետ Ռեջեփ Թայիփ Էրդողանը դեկտեմբերի լույս 26-ի գիշերը հայտարարել է, որ ինքը նախագահ Աբդուլլահ Գյուլի հետ խորհրդակցելուց հետո փոխել է կառավարության 10 անդամների: Այդ մասին հաղորդում է BBC հեռուստառադիոկորպորացիան:
Պաշտոնանկ արված անձանց մեջ է Եվրոմիության հետ փոխհարաբերությունների նախարար Էգեմեն Բաղըշը: Ֆրանսպրես գործակալությունը նշում է, որ նրա պաշտոնում նշանակվել է Մեւլութ Չավուշօղլուն: Պաշտոնից զրկվել է նաեւ արդարադատության նախարար Սադուլլահ Էրգինը:
Էրդողանը կառավարության նոր անդամների ցանկը նախագահ Գյուլին էր ներկայացրել չորեքշաբթի օրը: Նույն օրն արդեն հրաժարական էին տվել բնապահպանության եւ քաղաքային պլանավորման նախարար Զաֆեր Չաղլայանը եւ ներքգործնախարար Մուամմեր Գյուլերը: Նախագահ Գյուլը եւ վարչապետ Էրդողանը իրենց հանդիպման ժամանակ պայմանավորվել էին, որ վարչապետը կփոխի կառավարության կազմը:
Այս ամենի պատճառը Թուրքիայում դեկտեմբերի կեսերին պայթած կոռուպցիոն սկանդալն է: Ընդհանուր առմամբ ձերբակալվել է 80 մարդ, սակայն հափշտակումների, վատնումների եւ կաշառակերության այլ դրսեւորումների հետ կապված մեղադրանքներ ներկայացվել են 24 անձանց: Նրանց մեջ կան բարձրաստիճան պետծառայողների զավակներ, մասնավորապեսՙ պետբանկի նախագահի, ներքգործնախարարի եւ էկոնոմիկայի նախարարի որդիներ: Բնապահպանության եւ քաղաքային պլանավորման նախարարի որդուն հարցաքննությունից հետո ազատ են արձակել:
