Միավորված ազգերի կազմակերպությունը պաշտոնապես հայտարարել է, որ Սիրիային նվիրված հաշտության կոնֆերանսը Ժնեւում սկսվելու է 2014 թ. հունվարի 22-ին: Այդ մասին հաղորդում է Ասոշիեյթեդ պրես գործակալությունը:
ՄԱԿ-ի գլխավոր քարտուղար Բան Կի Մունը տվյալ հաղորդագրությունը մեկնաբանելիս հույս է հայտնել, որ կոնֆերանսը հնարավորություն կտա Սիրիայում վերջ դնել քաղաքացիական պատերազմին եւ սկսել խաղաղ վերափոխություն:
Գլխավոր քարտուղարի խոսքերովՙ կոնֆերանսի նպատակը պետք է դառնա երկրի անցումային կառավարության ստեղծումը, որի կազմում կընդգրկվեն ինչպես իշխանություններին, այնպես էլ ընդդիմությանը գոհացնող մարդիկ: Այդ կառավարությունը Սիրիայում պետք է ստանա ամբողջ իշխանությունը:
ՄԱԿ-ի գլխավոր քարտուղարը նաեւ հայտարարել է, որ ակնկալում է բոլոր շահագրգիռ պետությունների օժանդակությունը հաշտության բանակցություններին:
Բան Կի Մունը չի ասել, թե ընդդիմության կողմից կոնկրետ ով է մասնակցելու բանակցություններին: Առայժմ որոշված չէ նաեւ, թե ինչ ձեւաչափով են անցկացվելու բանակցությունները: Մասնավորապես հայտնի չէ, թե դրանց մասնակցելո՞ւ են արդյոք Սաուդյան Արաբիան, Իրանը եւ Քաթարը:
Անցյալում սիրիացի ընդդիմադիրները քանիցս հայտարարել էին, որ իրենք չեն մասնակցի որեւէ բանակցության, եթե չկատարվի իրենց գլխավոր պայմանըՙ նախագահ Բաշար Ասադի պաշտոնաթողությունը: Իսլամիստների արմատական որոշ խմբավորումներ նույնիսկ սպառնացել էին սպանել այն մարդկան, ովքեր կփորձեն նախքան այդ պայմանից, կատարումը բանակցություններում ներկայացնել ընդդիմությանը:
