Կալիֆոռնիայի բնակիչները դարձել են մի արտասովոր երեւույթի ականատեսներ: Նոյեմբերի 6-ի ուշ երեկոյան նրանք երկնքում նկատել են խոշոր հրե գունդ: Կարճատեւ թռիչքից հետո երկնային մարմինը պայթել է եւ մասերի բաժանվել: Ենթադրաբար դա եղել է ասուպ:
Տեղական NBC-4 հեռուստաալիքը բազմաթիվ հեռախոսազանգեր է ստացել նահանգի տարբեր քաղաքներից, այդ թվումՙ Լոս Անջելեսից: Բնակիչները պատմել են «բռնկված աստղերի» եւ երկնային «հրավառության» մասին:
Մինչդեռ Լոս Անջելեսում գտնվող Գրիֆֆիթի աստղադիտարանի ներկայացուցիչները չեն հաստատել երկնային մարմնի հայտնվելու փաստը եւ միայն նշել են, որ իրենք բազմաթիվ հարցեր են ստացել բնակիչներից: Լոս Անջելեսում ԱՄՆ քաղաքացիական ավիացիայի գործակալության ներկայացուցիչ Մերի Սլոսսոնն իր հերթին հայտարարել է, թե գործակալությունը ասուպային անձրեւի կամ նման երեւույթների վերաբերյալ ծանուցումներ չի ստացել:
ԻՏԱՌ-ՏԱՍՍ-ը հիշեցնում է, որ 2013 թ. փետրվարի 15-ին Ռուսաստանի տարածքի վրա ընկան այն ասուպի բեկորները, որը Երկրի վրա ընկած խոշորագույն երկնային մարմինն էր 1908 թ. Տունգուսյան ասուպի անկումից ի վեր: Ասուպային անձրեւի ականատեսները դարձան ՌԴ Տյումենի, Սվերդլովսկի, Չելյաբինսկի, Կուրգանի մարզերի եւ Բաշկիրիայի բնակիչները:
