Ժնեւում հոկտեմբերի 15-ին Իրանը իր միջուկային ծրագրի հետ կապված երկօրյա բանակցություններ է սկսել «Վեցյակի» երկրների (ԱՄՆ, ՌԴ, Մեծ Բրիտանիա, Ֆրանսիա, Չինաստան, Գերմանիա) եւ Եվրոմիության ներկայացուցիչների հետ: Դիվանագիտական աղբյուրներ վկայակոչելովՙ Ֆրանսպրեսը հաղորդում է, որ իրանական կողմը հանդես է եկել նոր առաջարկություններով, եւ որ բանակցությունները սկսվել են «հուսադրող մթնոլորտում»:
«Լիբերասիոն» թերթի կայքէջը հաղորդում է, որ Ժնեւի բանակցություններում նախագահում է Եվրոմիության դիվանագիտության պատասխանատու Քեթրին Էշթոնը, որի խոսնակ Մայքլ Մաննը հայտարարել է, որ իրանցիների նոր առաջարկությունների փաթեթի ներկայացումը տեւել է մի ամբողջ ժամ:
Ամերիկացի պաշտոնական անձանցից մեկի բնորոշմամբ, Ժնեւի բանակցություններում «մթնոլորտը նորացված է», քանի որ առաջին անգամ քննարկումներն անցկացվում են անգլերեն:
«Վեցյակի» երկրները Ժնեւում ներկայացված են ԱԳՆ քաղաքական տնօրենների կամ փոխարտգործնախարարների մակարդակով:
Իրանցիները նշում են, որ իրենց նպատակն է իրանական միջուկային ծրագրի հարցում Արեւմուտքի հետ փոխհամաձայնության հասնել ամենաշատը 1 տարում, իսկ նախնական փուլը պետք է տեւի 1-2 ամիս: Իրանի արտգործնախարար Մոհամմադ Ջավադ Զարիֆը անհրաժեշտ է համարում նախարարների մակարդակով մի նոր հանդիպման անցկացումը:
ԱՄՆ-ի պատվիրակությունն առաջին անգամ գլխավորում է պետքարտուղարի քաղաքական գործերի գծով տեղակալ Վենդի Շերմանը: Նրան ուղեկցում են հակաիրանական տնտեսական պատժամիջոցների կիրառման պատասխանատուները: Պատժամիջոցների քաղաքականությունը լրջորեն ազդել է Իրանի տնտեսության վրա: Ամերիկացի փորձագետները այդ պատասխանատուների ներկայությունը համարում են Թեհրանի հանդեպ Վաշինգտոնի բարյացակամության դրսեւորման նշան:
