Ուկրաինան դադարեցնում է ժամկետային զինծառայության զորակոչը: Երկրի նախագահ Վիկտոր Յանուկովիչը ստորագրել է հրամանագիր ընդհանուր զինապարտությունը վերացնելու եւ զինված ուժերը պայմանագրային հիման վրա համալրելու մասին: Այդ մասին նա հայտարարել է Ուկրաինայի հերոսուհիների հետ հանդիպման ժամանակ, հաղորդում է «Ինտերֆաքս-Ուկրաինա» գործակալությունը:
Դրա հետ մեկտեղ նախագահը նշել է, որ ժամկետային ծառայության զինակոչը պահպանվում է Ուկրաինայի ներքին զորքերում:
«Այսօր ունենք այնպիսի սպառազինություն, այնպիսի ռազմական տեխնոլոգիաներ, որոնք պահանջում են շատ բարձր պրոֆեսիոնալ մակարդակ: Տեխնիկան շատ բարդ է, ուստի բանակն այժմ պետք է լինի պրոֆեսիոնալ», ընդգծել է Յանուկովիչը:
Նախագահը համոզված է, որ բանակում պայմանագրով ծառայելու պետք է գնան «այն մարդիկ, ովքեր ձգտում են ծառայել, ում ձգում է զինվորականի մասնագիտությունը»:
2012 թ. տվյալներովՙ Ուկրաինայի զինված ուժերի թվակազմը 184 հազար է: Եվրոպայում ուկրաինական բանակը մեծությամբ 5-րդն է:
