Վ. Պ.
Լիտվայի, Լեհաստանի եւ Միացյալ Թագավորության արտգործնախարարներ Լինաս Լինկեւիչուսը, Ռադոսլավ Սիկորսկին եւ Դեվիդ Լիդինգտոնը հանդես են եկել համատեղ հայտարարությամբ`«Արեւելյան գործընկերություն. շարժվելով առաջ» կոնֆերանսի շրջանակներում Վիլթըն պարկում տեղի ունեցած հանդիպմանը:
Հոկտեմբերի 14-15-ին տեղի ունեցած միջոցառմանը արտաքին գործերի պատասխանատուները շեշտել են, որ Վիլնյուսում նոյեմբերի վերջին կայանալիք Արեւելյան գործընկերության գագաթաժողովը կարեւոր պահ կլինի Եվրոմիության ու Արեւելյան Եվրոպայի համար:
«Ասոցիացման համաձայնագրի ստորագրման հնարավորությունը Ուկրաինայի համար` ներառյալ Խոր եւ համապարփակ ազատ առեւտրի գոտու ստեղծման համաձայնագիրը, ինչպես նաեւ նույն փաստաթղթերի նախաստորագրումը Վրաստանի ու Մոլդովայի հետ կարեւոր անկյունաքար կլինեն Արեւելյան գործընկերների հետ ԵՄ հարաբերությունների վերասահմանման ու հզորացման համար», ասվում է փաստաթղթում:
Ըստ հայտարարությանՙ արեւելյան գործընկերներն արդեն «անդարձելի եւ հաստատուն քաղաքական ու տնտեսական բարեփոխումներ են իրականացրել», որից կշահեն այդ երկրների քաղաքացիները: Արտգործնախարարներն իրենց հայտարարությամբ աջակցություն ու պատրաստակամություն են հայտնել նպաստելու ինչպես բարեփոխումների իրականացմանը, այնպես էլ Ասոցիացման համաձայնագրի իրագործմանը:
Հայտարարությամբ ցանկություն է արտահայտվում ոչ միայն ապագայում Արեւելյան գործընկերության` ԵՄ-ի հետ ավելի սերտ կապերի մոդել տեսնել, այլեւ ապագայում` հնարավոր անդամակցություն, իհարկե, բոլոր ժողովրդավարական արժեքների հարգանքի ու ազատական տնտեսության պարագայում:
