Վեհափառ հայրապետ Գարեգին Երկրորդի հանդիսապետությամբ, ներկայությամբ հանրապետության նախագահ Սերժ Սարգսյանի, շվեյցարահայ բարերարներ Տիգրան եւ Հելեն Իզմիրլյանների երեկ տեղի ունեցավ Իզմիրլյան բժշկական կենտրոնի բացումը:
Իզմիրլյան բժշկական կենտրոնը ստեղծվել է Պրոկտոլոգիայի գիտահետազոտական ինստիտուտի հիմքի վրա: Հայկական բարեգործական ընդհանուր միությունը մասնավորեցրել էր այս ինստիտուտը 2000 թվականին եւ 2001-ին նվիրաբերել Մայր աթոռին: 2000-ին ինստիտուտն արդեն ձեւավորվել էր որպես բազմապրոֆիլ հիվանդանոց, եւ կրում էր Սուրբ Ներսես Մեծ անունը: Այնուհետեւ Իզմիրլյան հիմնադրամի բարերարությամբ կառուցվում է բուժկենտրոնի նոր մասնաշենքը, իսկ 2013-ից ամբողջ համալիրը վերանվանվում է «Իզմիրլյան բժշկական կենտրոն», որը ներառում է նաեւ Սուրբ Ներսես Մեծ կենտրոնը, որն արդեն դարձել է գիտակրթական կենտրոն եւ համակարգելու է բուժկենտրոնի համապատասխան ծրագրերը կրթական ու գիտական հաստատությունների հետ:
Այսօր բժշկական հաստատությունն ընդգրկում է 139 մահճակալներով մեծ հիվանդանոց` 9 հիմնական բաժանմունքներով, բաղկացած է 3 մասնաշենքից եւ ունի 200 աշխատակից: Հիվանդանոցում կմատուցվեն բժշկական տարբեր ծառայություններ:
Իզմիրլյան բժշկական կենտրոնի գործադիր տնօրեն, պրոֆեսոր Արմեն Մուրադյանը նշում է, որ բուժծառայությունների գները չեն տարբերվում այլ բուժկենտրոնների գներից. «Մենք սերտորեն համագործակցում ենք նաեւ սփյուռքի մեր հայրենակիցների հետ, նրանք Սփյուռքում մեծ անուն եւ մեծ փորձ ունեցող բժիշկներ են»:
Տնօրենը հավելում է, որ ամեն ամիս կազմակերպվող արտագնա այցերով փորձում են որակյալ բուժօգնություն հասցնել նաեւ սահմամերձ գյուղեր:
Մայր աթոռի հովանու ներքո գործող Իզմիրլյան բուժկենտրոնը հիմնանորոգվել է Իզմիրլյան հիմնադրամի եւ տիկին Լուիզ Մանուկյան Սիմոնի բարերարությամբ: Հիվանդանոցը կահավորվել է Մայր աթոռի բարերար Անդրե Քսաջիկյանի (Բրազիլիա) նվիրատվությամբ: Բուժկենտրոնն իր միջոցներով ձեռք է բերել բժշկական ժամանակակից սարքավորումներ, «Սարգիս եւ Սիրան Գաբրիելյաններ» եւ «Բուլուկյան» հիմնադրամները նույնպես ֆինանսական հատկացումներ են տրամադրել ի նպաստ հիվանդանոցի:
Լրագրողների հետ զրույցի ժամանակ Արմեն Մուրադյանը տեղեկացրեց, որ «Կոնվերս» բանկի հետ բուժկենտրոնն ունի պայմանավորվածություն, որը հիվանդներին տալիս է հնարավորություն առանց գրավի ու տոկոսի վերցնելու վարկեր բանկից Իզմիրլյան բուժկենտրոնում իրենց բուժումները ստանալու համար:
Հիվանդասենյակներում երեկ էլ կարող էիք տեսնել հիվանդների: Շինարարության տարիներին բուժծառայությունները չեն դադարեցվել, իսկ հիվանդների` տարեցտարի ավելացող դիմելիությունը փաստում է, որ հիվանդանոցի հանդեպ տարեցտարի ավելանում է վստահությունը:
Ամենայն հայոց կաթողիկոսն իր խոսքում երեկ նշեց, որ հիվանդանոցի վերանորոգմամբ եւ բարեկարգ պայմանների ստեղծմամբ բժշկական կենտրոնում դրվում է գործունեության նոր սկիզբ: Վեհափառ հայրապետն ընդգծեց, որ Իզմիրլյան բժշկական կենտրոնը շարունակելու է մատուցել նաեւ բարեգործական բուժծառայություններ:
Այնուհետեւ Ամենայն հայոց կաթողիկոսը Տիգրան Իզմիրլյանին շնորհեց Ասպետ Սուրբ Էջմիածնի տիտղոս եւ հայրապետական շքանշան նրա ազգանվեր ձեռնարկների համար:
