Հյուսիս-հարավ ավտոմաճանապարհի շինարարության աշխատանքների մասին խոսելովՙ երեկ տրանսպորտի եւ կապի նախարար Գագիկ Բեգլարյանն ասաց, որ օրական Երեւան-Աշտարակ եւ Երեւան-Արտաշատ ճանապարհահատվածներում երկու ուղղությամբ բետոնալցվում է 500 մ տարածություն: Նրա հավաստմամբՙ աշխատանքները հունի մեջ ընկնելուց հետո այդ ցուցանիշը օրական կհասցվի 700-800 մ-ի: Այդպես շարունակվելու դեպքում, այդ աշխատանքների 60 տոկոսը մինչեւ տարեվերջ կավարտեն, ինչի առնչությամբ վարչապետ Տիգրան Սարգսյանը հայտնեց, որ 60 մլն դոլարի աշխատանքներ են նախատեսվում: Սակայն կառավարության նիստից հետո, լրագրողների հետ զրույցի ժամանակ, Գագիկ Բեգլարյանն արդեն աշխատանքերի 40 տոկոսի ավարտման մասին էր ասում:
Խոսելով կապալառու ընկերության մասինՙ տրանսպորտի եւ կապի նախարարը բավարար համարեց նրա աշխատանքը, ասելով, թե «այնպես չէ, որ նախարարությունն ընկերության աշխատանքներից գոհ է 100 տոկոսով»: Միաժամանակ, նա նշեց, որ աշխատանքներում լուրջ թերացումներ հայտնաբերելուց հետո վերահսկողություն իրականացնող կազմակերպությունը ամբողջովին փոխել է անձնակազմը եւ ավելացրել մասնագետների թիվը:
Այն հարցին, թե ե՞րբ է Ասիական զարգացման բանկը տրամադրելու «Տրանշ 3» ծրագրի ֆինասավորումը, Գագիկ Բեգլարյանը պատասխանեցՙ 1,5-2 ամսից:
