Moderator.az-ի փոխանցմամբՙ այդ մասին անձամբ հայտարարել է քրդերեն «Դիպլոմատ» թերթի գլխավոր խմբագիր Թահիր Սուլեյմանովը: «Ես հպարտանում եմ Օջալանի հետ հարազատությամբ եւ նրան համարում քրդական ազատագրական շարժման առաջնորդը»,- ասել է Սուլեյմանովը:
Նրա գնահատմամբՙ Ադրբեջանում Թուրքիայից «ֆինանսավորվող որոշ շրջանակներ իրեն համարում են անջատողական` նկատի ունենալով Օջալանի հանդեպ համակրանքը»: Սուլեյմանովը հստակ պնդել է, որ իր «պապը եւ Օջալանի հայրը զարմիկներ են», եւ ինքը «չի կարող չցանկանալ, որ նրան ազատ արձակեն թուրքական բանտից»:
Իրավիճակի նրբությունն այն է, որ Թահիր Սուլեյմանովն առաջադրվել է Ադրբեջանի նախագահի թեկնածու: Այսինքն, Ադրբեջանում պետության ղեկավարի պաշտոնին հավակնում է մեկը, որ ոչ միայն չի թաքցնում, որ ազգությամբ քուրդ է, այլեւ հրապարակային հայտարարություն է անում Թուրքիայում «ահաբեկչական եւ անջատողական գործողությունների» մեղադրանքով ցմահ ազատազրկման դատապարտված Օջալանի հետ արյունակցական կապի մասին:
Ավելի վաղ Սուլեյմանովը հայտարարել էր, որ նախագահի թեկնածու է առաջադրվում, որպեսզի ցույց տա, որ Ադրբեջանի քրդերը «հանդես են գալիս հանուն ադրբեջանական պետության»: Երեկվա նրա հայտարարության մեջ, սակայն, այդ նպատակադրվածությունը հիշատակված չէ: Սուլեյմանովը նշել է, որ Ադրբեջանում «պաշտոնական տվյալներով 13 000 քուրդ է բնակվում», սակայն իրեն կհաջողվի հավաքել «նախագահի թեկնածու գրանցվելու համար անհրաժեշտ 40 000 ստորագրություն»:
Այդ կերպ նա կարծես հասկանալ է տվել, որ իրականում Ադրբեջանում ավելի մեծ թվով էթնիկ քրդեր են բնակվում, եւ ընդգծել, որ, իրենց տվյալներով, «քրդերը 2,5 միլիոն են», եւ ինքն «առնվազն կես միլիոն ձայն ստանալու հույս ունի»: Ավելին, Սուլեյմանովը պնդել է, որ իբրեւ նախագահի թեկնածու «բացահայտ պաշտպանելու է Ադրբեջանի քուրդ բնակչության իրավունքները»:
Սուլեյմանովի փաստաթղթերը ներկայացվել են Ադրբեջանի ԿԸՀ, եւ նա հույս ունի, որ անհրաժեշտ քանակով ստորագրություններ կհասցնի հավաքել եւ գրանցվել նախագահի թեկնածու եւ քարոզարշավ սկսել: Ադրբեջանի էթնիկ փոքրամասնություններից նախագահի թեկնածու միայն քրդերն են առաջադրել: Ռուսական համայնքի ղեկավար, Միլլի մեջլիսի պատգամավոր Միխայիլ Զաբելինը հայտարարել է, որ իրենք «լիովին պաշտպանում են Իլհամ Ալիեւի թեկնածությունը», իսկ ազգային մյուս փոքրամասնությունները, մասնավորապես` լեզգիները, թալիշները եւ թաթերը թեեւ սեփական թեկնածու չեն առաջադրել, բայց առայժմ չեն էլ հայտարարել, թե պաշտպանում կամ պաշտպանելու են Իլհամ Ալիեւին:
Նկատենք, որ քուրդ խմբագիր Սուլեյմանովը Օջալանի հետ հարազատական կապի մասին հայտարարություն է արել Ադրբեջանի ԱԱ նախարարության Նախիջեւանի բաժանմունքի նախկին աշխատակից Իբրահիմ Մուսաեւի շուրջը եղած սկանդալային պատմության համապատկերի վրա: Բանն այն է, որ Մուսաեւը, ներկայումս գտնվելով Ռուսաստանում, սենսացիոն հայտարարություն է արել, որ Ադրբեջանի պաշտպանության նախարարությունը «զենք եւ զինամթերք, ինչպես եւ պարեն է մատակարարում PKK-ի գրոհայիններին»:
Մուսաեւի բացահայտմամբՙ այդ մասին տեղեկությունը տարածել է Նախիջեւանի բնակիչ Թուրաջ Զեյնալովը, որը, լինելով զենք-զինամթերքով բարձված մեքենայի վարորդ, օգտվելով ուղեկցող սպայի անփութությունից, հասցրել է բջջային հեռախոսով «լուսանկարել բեռն ուղեկցող փաստաթղթերը, պատճենահանել եւ տարածել»:
Այդ աղմկահարույց բացահայտումից հետո Զեյնալովը ձերբակալվել է Նախիջեւանի ԱԱ ծառայության կողմից, նրան առաջադրվել է Իրանի «օգտին լրտեսության» մեղադրանք, սակայն Զեյնալովը հրաժարվել է ստորագրել «իրեն ներկայացված կեղծ փաստաթղթերը», որից հետո նա «ենթարկվել է դաժանագույն կտտանքների եւ մահացել քննչական մեկուսարանում»: Նախիջեւանի ԱԱ ծառայությունն Իբրահիմ Մուսաեւին հանձնարարել է «արատավորող կապ հաստատել» Զեյնալովի այրու հետ, համոզել, որպեսզի վերջինս հրապարակավ հերքի ամուսնու սպանության փաստը եւ ընդունի մահվան պաշտոնական վարկածը: Մուսաեւին դա հաջողվել է մասամբ:
Քննչական մեկուսարանում սպանած Զեյնալովի այրին նախ տեղական հեռուստատեսությամբ ընդունել է, որ ամուսինը «հիվանդ էր եւ մահացել է սրտի կաթվածից», ապա Բաքվում հանդիպել իրավապաշտպաններին եւ պատմել ճշմարտությունը: Հետեւել է նոր «հատուկ առաջադրանք». Մուսաեւին հանձնարարվել է «սպանել Զեյնալովի այրուն», սակայն երիտասարդ սպան գերադասել է լքել Ադրբեջանը եւ ապաստան գտնել Ռուսատանում:
Ադրբեջանն Ինտերպոլի միջոցով հայտարարել է միջազգային հետախուզում: Այս շաբաթասկզբին, սակայն, ՄԻԵԴ-ն անդրադարձել է Մուսաեւի գործին եւ Ռուսաստանի դատական իշխանություններին հորդորել, որ Ադրբեջանի ԱԱ ծառայության նախկին աշխատակիցը չենթարկվի արտահանձնման:
Սկանդալը նախագահի քուրդ թեկնածուի համար կարող է քարոզչական թեմա դառնալ այն իմաստով, որ Ադրբեջանը պաշտոնական խողովակներով է աջակցում PKK-ին, մինչդեռ ինքը միայն չի ժխտում, որ Օջալանի հետ հարազատական կապեր ունի: Հետաքրքրական է, թե այս ամենին ինչպես կվերաբերվի Թուրքիան: Այս իմաստով «առաջին ծիծեռնակն» արդեն կա. թուրքական մամուլը գրել է, որ Ստամբուլում ազգությամբ ադրբեջանցի, «օրենքով գող Լոթի Գուլուի սպանությունն իրականացրել է նույնպես օրենքով գող Ռովշան Լենքորանսկին, բայց այն բանից հետո, երբ մեկուկես ժամանոց գաղտնի է հանդիպում է ունեցել Ադրբեջանի ՆԳՆ կազմակերպված հանցավորության դեմ պայքարի վարչության պետի հետ` Ստամբուլի հյուրանոցներից մեկում»: Haberturq-ը նույնիսկ տարածել է այդ հանդիպման լուսանկարը:
Կապ ունի՞ դա Ադրբեջանում քրդական թեմայի աշխուժացման հետ, թե՞ թուրքական հատուկ ծառայությունները միայն պատասխանել են վերջերս Բաքվում թուրք գործարար շրջանակներում Ադրբեջանի ՆԳՆ նույն վարչության կատարած ձերբակալություններին, չենք կարող ենթադրություններ անել: Արձանագրենք միայն, որ նախընտրական այս շրջանում թուրք-ադրբեջանական հարաբերություններում կարող են տեղի ունենալ այլ անակնկալներ եւս:
