Գեւորգ Ղազարյանը թիմակիցների հետ պայքարը կշարունակի Եվրոպայի լիգայում
Հայտնի դարձան ֆուտբոլի չեմպիոնների լիգայի խմբային մրցաշարի բոլոր 32 մասնակիցները: Վերջին 5 ուղեգրերին տիրեցին «Միլանը», «Ռեալ Սոսյեդադը», «Վիկտորիան», «Սելթիկն» ու «Զենիթը»:
Կարագանդայի «Շախտյորին», որի կազմում հանդես է գալիս Գեւորգ Ղազարյանը, չհաջողվեց խոշոր անակնկալ մատուցել ու խմբային մրցաշարի ուղեգիր նվաճել: «Շախտյորը» Գլազգոյում «Սելթիկին» պարտվեց 0-3 հաշվով, ընդ որում մրցակցության ելքը վճռած 3-րդ գնդակը դաշտի տերերը խփեցին ավելացված ժամանակի 2-րդ րոպեին: Այսպես ղազախական հեքիաթն ավարտվեց: «Շախտյորը» պայքարը կշարունակի Եվրոպայի լիգայի խմբային մրցաշարում:
Խաղից հետո «Շախտյորի» գլխավոր մարզիչ Վիկտոր Կումիկովը հետեւյալ կարծիքն է հայտնել. «Մենք պարտվեցինք մի թիմի, որն իր կարգով ու ֆուտբոլիստների անհատական վարպետությամբ գերազանցում էր մեզ: Իհարկե, ցավալի է, որ հանդիպման ելքը վճռվեց ավելացված ժամանակում: Սակայն դաշտի տերերն առավելություն ունեին եւ արդարացիորեն հաղթեցին: Ինչ արած, պայքարը կշարունակենք Եվրոպայի լիգայում»:
Հետաքրքրական է, որ խաղի նախօրեին կայացած մամուլի ասուլիսում Վիկտոր Կումիկովը հայտարարել էր, որ «Շախտյորին» ավելի ձեռնտու է Եվրոպայի լիգայի խմբային մրցաշարում հանդես գալը. «Մեր գլխավոր խնդիրը եվրոպական մրցաշարի խմբային փուլ մտնելն էր, ինչին հասանք: Իհարկե, մեզ այժմ միայն մեկ քայլ է բաժանում չեմպիոնների լիգայի խմբային մրցաշարից: Մենք ցանկանում ենք արդյունքի հասնել: Սակայն պարտությունը մեզ համար ողբերգություն չի լինի: Կարծում եմ, որ դա նույնիսկ ավելի լավ կլիներ, որովհետեւ ֆուտբոլում հարկավոր է աստիճանաբար զարգանալ»:
Հարկ է նշել, որ պատասխան խաղից առաջ անցկացրած հարցման արդյունքներով պարզվել էր, որ «Շախտյորի» երկրպագուների 60 տոկոսը չի հավատում թիմի վերջնական հաջողությանը «Սելթիկի» հետ մրցավեճում: Թիմի երկրպագուներից մեկի համար հանդիպման արդյունքը ողբերգական դարձավ: 56-ամյա տղամարդը շատ էր վշտացել «Շախտյորի» անհաջողությունից: Նրա ինքնազգացողությունը կտրուկ վատացել էր: Բժիշկներին չէր հաջողվել փրկել հիվանդի կյանքը:
«Միլանը» սեփական հարկի տակ 3-0 հաշվով հաղթեց «Էյնդհովենին»: Մրցակիցների առաջին հանդիպումն ավարտվել էր ոչ-ոքիՙ 1-1:
«Զենիթը» պորտուգալական «Պասուշ դե Ֆեռեյրայի» հետ սեփական հարկի տակ անցկացրած խաղում էլ հաղթեց 4-2 հաշվով (առաջինում գրանցվել էր 4-1 հաշիվ): Իսպանական «Ռեալ Սոսյեդադն» էլ կրկին 2 անպատասխան գնդակ ուղարկեց ֆրանսիական «Լիոնի» դարպասը: Պլզենի «Վիկտորիան» էլ 2-րդ հաղթանակը տոնեց Սլովենիայի «Մարիբորի» նկատմամբ (1-0) ու կշարունակի պայքարը չեմպիոնների լիգայի խմբային մրցաշարում: Հիշեցնենք, որ ներկայումս հենց «Վիկտորիայի» ֆուտբոլիստ է համարվում Էդգար Մալաքյանը, որը սակայն վարձավճարով հանդես է գալիս «Բանանցում»:
Երեկ շվեյցարական Նիոն քաղաքում կայացավ չեմպիոնների լիգայի խմբային մրցաշարի մասնակիցների վիճակահանությունը: Դորտմունդի «Բորուսիան» ընդգրկվեց F խմբում, որտեղ մրցելու է «Արսենալի», «Մարսելի» եւ «Նապոլիի» հետ: Մյուս խմբերի կազմն այսպիսին է:
A – «Մանչեսթր Յունայթեդ», «Շախտյոր», «Բայեր», «Ռեալ Սոսյեդադ»:
B – «Ռեալ», «Յուվենտուս», «Գալաթասարայ», «Կոպենհագեն»:
C – «Բենֆիկա», ՊՍԺ, «Օլիմպիակոս», «Անդերլեխտ»:
D – «Բավարիա», ԲԿՄԱ, «Մանչեսթր Սիթի», «Վիկտորիա»:
E – «Չելսի», «Շալկե-04», «Բազել», «Ստյաուա»:
G – «Պորտո», «Ատլետիկո», «Զենիթ», «Աուստրիա»:
H – «Բարսելոն», «Միլան», «Այաքս», «Սելթիկ»:
