ՀԱՄԱԳՈՐԾԱԿՑՈՒՄ ԵՆ ԵՐԵՎԱՆԻ ՈՒ ՍՏԵՓԱՆԱԿԵՐՏԻ ԲԺԻՇԿՆԵՐԸ
«Երեւանի շտապ բուժօգնություն» ՓԲԸ-ի մասնագետները հունիսի 23-ից Ստեփանակերտում են` համաձայն Երեւանի ու Ստեփանակերտի քաղաքապետարանների միջեւ կնքված համագործակցության: Մասնագետների Արցախ մեկնելը նպատակ է հետապնդում տեխնիկական եւ մեթոդական աջակցություն ցուցաբերել ԼՂՀ մայրաքաղաքի շտապ բուժօգնության ծառայությանը:
Երեւանի քաղաքապետարանից տեղեկացանք, որ «Երեւանի շտապ բուժօգնության» մասնագետները Ստեփանակերտում են հունիսի 23-ից, եւ տեղի «Շտապ բուժօգնություն» կայանի բժիշկների հետ մասնակցում են կանչերին, ցուցաբերում բժշկական անհրաժեշտ օգնություն` տեղում կատարելով փորձի փոխանակում:
Հյուրընկալելով Երեւանից ժամանած բժիշկներինՙ Ստեփանակերտի քաղաքապետ Սուրեն Գրիգորյանը շնորհակալություն է հայտնել նրանցՙ ցուցաբերվող աջակցության համար, հույս հայտնել, որ նման այցերը կլինեն շարունակական, եւ Ստեփանակերտի շտապ օգնության կայանի գործունեությունն աստիճանաբար կհամապատասխանեցվի ժամանակակից պահանջներին: «Երեւանի շտապ բուժօգնություն» ՓԲԸ-ի տնօրեն Թագուհի Ստեփանյանը ներկայացրել է այցի շրջանակում իրականացվող աշխատանքները:
Ծրագրի հերթական փուլը շարունակվելու է մինչեւ հունիսի 26-ը:
