Մանկավարժական համալսարանում մեծ հանդիսավորությամբ տեղի ունեցավ 2012-2013 ուսումնական տարվա ավարտական դիպլոմների հանձնման պաշտոնական արարողությունը:
10 ֆակուլտետներից ուսումնառության ընթացքում լավագույն արդյունք ցուցաբերած 2-ական շրջանավարտի, ինչպես նաեւ հեռակա համակարգի երկու շրջանավարտի կարմիր դիպլոմներ հանձնեց ՀՀ կառավարության աշխատակազմի ղեկավար, նախարար Վաչե Գաբրիելյանը :
Վերջինս, կառավարության եւ համալսարանի խորհրդի անունից, շնորհավորելով օրվա հերոսներին, նշեց. «Սիրելի ներկա եւ ապագա մանկավարժներ, սա պատմական օր է ձեզ համար. դուք ստանում եք առհավատչյան այն բանի, որ ունեք գիտելիքներ եւ ի զորու եք դրանք փոխանցել հաջորդ սերունդներին: Դարեր շարունակ ուսուցիչը եղել է մեր ազգի գոյատեւման եւ հզորացման կարեւորագույն երաշխիքը: Դուք կրում եք ծանր, բայց հաճելի` ուսուցչի նվիրական կոչումը. առավել դժվար գործ, քան լինել ուսուցիչ, կրթել ապագա սերունդներին, դժվար է պատկերացնել: Շրջանավարտներդ այլեւս պատրաստ եք մեր` ազատ, անկախ Հայաստանում լծվել ապագա սերնդի կրթման կարեւորագույն եւ ազնիվ գործին»:
Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանը , օրհնելով ներկաներին եւ շնորհավորելով ամենաբարձր` մանկավարժի կոչմանն արժանանալու առթիվ, մաղթեց, որ Տիրոջ խաչը պահապան, ուղեցույց եւ մարդակից լինի նրանց:
Պաշտոնական մասին հաջորդած տոնական համերգի ընթացքում ջազային-էստրադային կատարումներով հանդես եկավ Հանրային ռադիոյի սիմֆոնիկ նվագախումբը` դիրիժոր, արվեստի վաստակավոր գործիչ Երվանդ Երզնկյանի ղեկավարությամբ:
Ի դեպ, մեկ օրում բուհի բոլոր շրջանավարտներին դիպլոմ հանձնելու արարողությունը դարձել է գեղեցիկ ավանդույթ: Մեկ օրում Մանկավարժական համալսարանը բակալավրի եւ մագիստրոսի դիպլոմ առկա եւ հեռակա բաժիններում շնորհեց 3200 շրջանավարտի:
Տոնական միջոցառմանը ներկա էին Մանկավարժական համալսարանի կառավարման խորհրդի անդամներըՙ պատգամավորներ, նախարարներ, ՀՊՄՀ ռեկտորը, բուհի պրոֆեսորադասախոսական կազմն ու բարձրաստիճան այլ հյուրեր:
