ՆԱՎԱՍԱՐԴ ԱՐՔ. ԿՃՈՅԱՆ. ՕՖՇՈՐԱՅԻՆ ԿԱԶՄԱԿԵՐՊՈՒԹՅԱՆ ՀԵՏ ԿԱՊ ՉՈՒՆԵՄ

Հ. Հ.

Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանը «Արմենպրես»-ի հարցազրույցում ասել է, որ Կիպրոսում գրանցված օֆշորային կազմակերպության հետ որեւէ առնչություն չունի: «Որեւէ առնչություն չունեմ եւ չեմ կարող տեղեկացված լինել դրա ծալքերին»: Կճոյանն ասել է, որ այժմ հետախուզման մեջ գտնվող Աշոտ Սուքիասյանի հետ որեւէ շփում չի պահպանում: «Աշոտ Սուքիասյանը Սբ Սարգիս եկեղեցու խաչքավոր է, այդ շրջանակներում ես իր հետ բավական մտերիմ եմ եղել: Բազմիցս ճամփորդել ենք միասին եւ, կարծես ճակատագրի հեգնանքով, 2011-ին ընկերներից մեկի հրավերով մի քանի օրով այցելել ենք Կիպրոսՙ Նիկոսիա, ու ներկա ենք գտնվել Աշոտի ընկերոջ ընտանեկան միջոցառմանը: Այդ ժամանակ ո՞ւմ մտքով կանցներ, որ Աշոտն իմ անունը կօգտագործի իր կազմակերպությունը գրանցելիս: Ես գիտեի, որ նա Կիպրոսում ընկերություն ունի, այլ մանրամասներ հայտնի չեն», ասել է Կճոյանըՙ հավելելով, որ Աշոտ Սուքիասյանիՙ Հայաստանը լքելուց հետո իրենց շփումը եղել է Նոր տարուն հեռախոսով: Անդրադառնալով «Բենթլի» մեքենային, որ նվիրել է Սուքիասյանը, Կճոյանն ասաց, որ «Բենթլի»-ով չի երթեւեկում, նախընտրում է օգտվել ծառայողական մեքենայից եւ մեքենան համարում է զուտ նվեր: