Մեր վերնագիրը հաստատում է նաեւ ավստրիական «Դեր Շտանդարտը», որ հաղորդում է Հայաստանի եւ Թուրքիայի բանագնացների՝ Մոսկվայից հետո երկրորդ հանդիպման վայրը՝ Շալլենբերգի հրավերով՝ Վիեննայում, փետրվարի 24-ին
Ավստրիական մամուլն անդրադարձել է Ավստրիայի արտգործնախարար Ալեքսանդր Շալլենբերգի փետրվարի 2-3-ը Հայաստան կատարած այցին: apa գործակալության ծավալուն հոդվածը հրապարակել են տեղի մի շարք կայքեր, իսկ «Վիիներ ցայթունգն» օրինակ, տեքստին երկու լուսանկար է կցել՝ Շալլենբերգի եւ Արարատ Միրզոյանի հանդիպումը ԶԼՄ-ների հետ ՀՀ արտգործնախարությունում եւ երկու նախարարների, նրանց ուղեկցող պատվիրակությունների այցը Ծիծեռնակաբերդ, ծաղկեպսակների զետեղումը հուշարձանին: Ոչ շատախոս տեսանյութ էլ կա, որ սկսվում է Ծիծեռնակաբերդից, ցույց տալիս, որ ավստրիացի պաշտոնյաները ոչ միայն պսակ են զետեղում, այլ նաեւ կարմիր մեխակներ դնում անշեջ կրակի շուրջ, ասել է, թե շեշտված խոնարհվում են Հայոց ցեղասպանության զոհերի հիշատակի առջեւ: Արտգործնախարար Միրզոյանը մոտենալով պատին Շալլենբերգին ցույց է տալիս Հայոց ցեղասպանության ողբերգության մասին աշխարհին իրազեկած երախտավորների անունները, որոնց հայ ժողովուրդը չի մոռանում: Այնուհետ տեսաշարը լրացվում է ԱԳՆ-ում հանդիպմամբ, որ նկատելի կարճառոտ է ներկայացվում: 2011-ից Հայաստանը Ավստրիայի հետ զարգացման համագործակցության սեւեռակետերից է, գրում է թերթը՝ մեջբերելով ՀՀ արտգործնախարար Միրզոյանի խոսքը, թե Հայաստանը ցանկանում է ԵԱՀԿ Մինսկի խմբի հետ աշխատել Ադրբեջանի հետ խաղաղություն հաստատելու ուղղությամբ: Ավստրիայի արտգործնախարն ընդգծել է Հարավկովկասյան տարածաշրջանի հանդեպ ԵՄ հետաքրքրությունների մասին:
Հրապարակման մեջ անդրադարձ կա արցախյան պատերազմին եւ առանձին ենթավերնագրով ներկայացված է Միրզոյանի՝ Ալիեւի հակահայկական հռետորաբանությունն ընդգծող շեշտադրումը: Ադրբեջանի հետ կնքվելիք խաղաղության հավանական պայմանագրի կարմիր գծերն, ըստ ՀՀ արտգործնախարար Միրզոյանի, ինքնորոշման իրավունքի պահպանումն ու ուժի կիրառումից հրաժարվելն են, գրում է «Վիիներ ցայթունգը» եւ շարունակում՝ Հայաստանն ու Ադրբեջանը շատ հեռու են խաղաղության պայմանագրից, ինչպես նաեւ ԼՂ տեւական կարգավիճակի մասին հստակեցումից: Անորոշ է մնում նաեւ ԼՂ-ում հայկական մշակութային եւ եկեղեցական ունեցվածքի պաշտպանության վերաբերյալ խնդիրը: Հիշեցնենք շաբաթներ առաջ «Ազգ» -ում հրապարակել էինք, թե ավստրիացի հայագետ Յասմին Դում- Թրագութը Մայր աթոռում զբաղվելու է Արցախի մշակութային հուշաձանների պահպանությամբ: «Վիիներ ցայթունգը» գրում է նաեւ, որ Ադրբեջանը պիտի ազատի հայ բոլոր ռազմագերիներին, իսկ դրա դիմաց Հայաստանը պետք է հանձնի հակամարտության գոտու ականապատման քարտեզները: Բայց Ադրբեջանը ոմանց ռազմագերի լինելու փաստը հրաժարվում է ընդունել եւ Հայաստանին մեղադրում, որ քարտեզները թերի են: Ենթադրվում է, որ շուրջ 50 հոգի դեռ ադրբեջանական գերության մեջ են, շեշտում է թերթը: Շալլենբերգն ընդգծել է Ավստրիայի եւ ԵՄ-ի ցանկությունը՝ Հարավային Կովկասը խաղաղ, կայուն եւ բարգավաճ տարածաշրջան տեսնել: «Մենք պատրաստ ենք օգնել», վստահեցրել է արտգործնախարարը: Ռուսաստանից Հայաստանի կախվածության մասին էլ գրում է «Վիիներ ցայթունգը»՝ դրան հաջորդող պարբերության մեջ հուշելով Շալլենբերգի այցի ազդանշանը՝ «ԵՄ-ն չի հրաժարվում Հայաստանից՝ այն ուրիշներին թողնելով»:
Լուսանկարների հեղինակ՝ © apa / Beima, Michael Gruber
