Շատերը կհիշեն՝ 2018-ի քաղաքական վարադասավորումներից հետո ինչպես էին նորեկ իշխանավորները մեծագույն խանդավառությամբ նախարարության կամ խորհրդարանի աշխատասենյակներից հանում Սերժ Սարգսյանի՝ ՀՀԿ-ականների կողմից պատին կախված լուսանկարը: Երիտասարդ պաշտոնյաներն անթույլատրելի էին համարում անձի պաշտամունքն ու կարծիք հայտնում, թե հետայսու մեր երկրում որեւէ մեկի անձը չպետք է բացարձակ արժեք լինի: Ժամակների հետ, այո, մարդիկ էլ փոխվեցին, կամ էլ գուցե չփոխվեցին, այլ պարզապես ապացուցեցին, որ վերամբարձ տեքստեր ասելիս՝ հասարակության հետ ազնիվ չեն եղել:
Օրերս Շուկայի վերահսկողության տեսչական մարմնի ղեկավարի գրառումներից մեկն ու դրան կցված լուսանկարն ուշադրությունս գրավեց: Երիտասարդ ղեկավար Արմեն Կոտոլյանն իր աշխատասենյակում արդեն կենսաթոշակի անցած աշխատակցին շնորհակալագիր էր հանձնում, իսկ պատին Նիկոլ Փաշինյանի լուսանկարն էր: Երեւույթն, իհարկե, զարմանալու չէ. թե՛ Ազգային ժողովի գրեթե բոլոր պատգամավորների, թե՛ կառավարության կաբինետի ներկայացուցիչների մեծամասնության աշխատասենյակներում պատին կամ աշխատասեղանին կա Փաշինյանի մեծադիր լուսանկարը: Ապշելունն այն է, որ կառավարությանը ենթակա ամենաանշան, փոքր, կառույցի ղեկավարն անգամ իր սուրբ պարտքն է համարում Նիկոլ Փաշինյանի նկարի ներքո աշխատել: Կասկածից վեր է, որ գործադրի կազմում գտնվող, կառավարությանը կամ վարչապետին առընթեր բոլոր ՊՈԱԿ-ներում, ԾԻԳ-երում, ու, առհասարակ, բոլոր տեսակի գերատեսչություններում, ղեկավարի աշխատասենյակում իր պատվո տեղն ունի Նիկոլ Փաշինյանի նկարը: Եվ եթե «հեղափոխականներն» այս երեւույթը նախկինում անձի պաշտամունք էին անվանում, ապա այժմ նույն բանը անելով՝ նկարից ոգեշնչվել են կոչում. արդարադատության նախկին նախարար Կարեն Անդրեասյանի ականջը կանչի:
ՍԵՎԱԿ ՎԱՐԴՈՒՄՅԱՆ
