ՀԱԿՈԲ ԳՈՒՅՈՒՄՃՅԱՆ
Մեր պաշտոնակից «Պայքար» շաբաթաթերթից խոր ցավով տեղեկանում ենք, որ հոկտեմբերի 26-ին, տեւական հիվանդությունից հետո, Երեւանում մահացել է հայտնի ասմունքող, ճարտարապետ ու բանաստեղծ Հակոբ Գույումճյանը, 79 տարեկան հասակում: Միջնակարգ կրթությունը Բեյրութի «Հովակիմյան-Մանուկյան» դպրոցում, իսկ մասնագիտականը՝ Երեւանի Պոլիտեխնիկ ինստիտուտի ճարտարապետական բաժնում ստացած Հ. Գույումճյանը առավելաբար ծանոթ է որպես տաղանդավոր ասմունքող, որ ելույթներ է է ունեցել սփյուռքի գլխավոր գրեթե բոլոր գաղթօջախներում:
Խորազգած ցավակցություններ երեք եղբորորդիներին՝ Միսաքին, Պարույրին եւ Զոհրաբին, ինչպես նաեւ բոլոր ընկերներին:
Հ. Գույումճյանի կյանքին ու գործունեությանը հանգամանալից կանդրադառնանք հետագայում: Մինչ այդ ասենք, որ հանգուցյալը անդամ էր ՌԱԿ-ին եւ ԹՄՄիությանը, որոնց վարչական տարբեր հարթակներում ու տարբեր ժամանակահատվածներում ստանձնել է պատասխանատու պաշտոններ:
ԶՈՀՐԱՊ ՏԵՈՔՄԵՃՅԱՆ
Բեյրութում, 67 տարեկան հասակում իր մահկանացուն է կնքել լիբանանահայ մամուլի, հատկապես «Զարթօնք» օրաթերթի անխոնջ աշխատակիցներից Զոհրապ Տեոքմեճյանը: Լրագրողական ասպարեզ մուտք գործելով որպես սպորտային մեկնաբան, ապա՝ արաբերենի իր փայլուն իմացությամբ անհրաժեշտ ներկայություն դառնալով արաբական մամուլից իր թարգմանություններով ու քաղվածքներով, նա հաստատուն դեր է կատարել հատկապես «Զարթօնք» օրաթերթում: Խորապես հայրենասեր եւ ազգայնասեր մարդ՝ Զոհրապ Տեոքմեջյանը վերջին տարիներին ընտանիքով տեղափոխվել էր մայր հայրենիք՝ իր երկու դուստրերին՝ Լյուսիին ու Սարինին հայկական միջավայրում ասպարեզ ստեղծելու նպատակադրումով:
«Ազգ»ի խմբագրությունը վշտակցում է այրուն՝ Բեյրութի Թեքեյան կենտրոնի երկարամյա քարտուղար տիկին Բերթային, դուստրերին եւ մյուս հարազատներին:
ԼԵՎՈՆ ՊԼԸՔՅԱՆ
Նոյեմբերի 11-ին, 70 տարեկան հասակում հանկարծամահ է եղել Ռամկավար Ազատական կուսակցության, Թեքեյան մշակութային միության եւ ՀԲԸՄիության Հալեպի շրջանակի կարկառուն անդամներից Լեւոն Պլըքյանը Երեւանում, ուր հանդերձ ընտանյոք հաստատվել էր սուրիական պատերազմի սկսվելուց հետո, եւ իր որդիների հետ կտորեղենի տպագրության եւ սպորտային հագուստների ձեռնարկություն էր ստեղծել, միաժամանակ շարունակելով, ինչպես Հալեպում, կուսակցական եւ միութենական աշխատանքները:
«Ազգ»ի խմբագրությունը վշտակցում է տիկնոջը՝ տիկին Սիլվային, զավակներին՝ Սոսիին, Արամին, Հակոբին եւ մյուս հարազատներին:
