Սույն վերնագրի տակ ՌԱԿ Լիբանանի պաշտոնաթերթ «Զարթօնք»ի սեպտ. 23-ի համարում ընդարձակ տեղեկություն է տրված Եղվարդում Լիբանանի քրիստոնյա-մարոնիտ դավանանքի ամենահայտնի սրբի՝ Մար Շարբելի 10 մետրանոց արձանի օծման արարողությունից: Ստորեւ փոքր հատված հիշյալ տեղեկատվությունից:
Աշխարհահռչակ Սուրբ Շարպելի արձանի տեղադրումն ու օծումը կատարուեցաւ 22 սեպտեմբեր 2024-ին, Հայաստանի Կոտայքի մարզի Եղվարդի շրջանին մէջ: 10 մեթր հասակ ունեցող սոյն արձանը կը հանդիսանայ նշեալ սուրբին առաջին սրբավայրը Կովկասի մէջ:
Հայաստանի մէջ գիւղատնտեսական մեծ ներդրումներ ընող Լիբանանցի գործարար, «Կարտենիա Լեպընիզ Ֆարմս» ընկերութեան սեփականատէր՝ Նիքոլա Ապու Ֆայսալն է նախաձեռնութեան մտայղացողն ու ֆինասաւորողը՝ ի կատարումն տարիներ առաջ իր ըրած ուխտին:
Նախաձեռնութիւնը ատենին ողջունած էին Հայ Կաթողիկէ եկեղեցին եւ Լիբանանի Մարոնի համայնքի ղեկավարութիւնը, որոնց հովանաւորութեամբ ալ կատարուեցաւ արձանին օրհնութեան յատուկ պատարագը:
Գործարարը Սուրբ Շարպելի արձանը պատուիրած էր լիբանանցի քանդակագործ Ժորժ Մախլուֆին: Վերջինիս Լիբանանի արհեստանոցին մէջ պատրաստուած արձանը ցամաքային ճամբով Հայաստան հասած էր օրեր առաջ: Կը նախատեսուի, որ նոյն արհեստանոցը պիտի քանդակէ երկրորդ արձան մըն ալ տեղադրուելու համար Վրաստանի մէջ:
Եղվարդի մէջ Սուրբ Շարպելի արձանի օրհնութեան արարողութեան ներկայ էին հոգեւորականներ, բարձրաստիճան հիւրեր ինչպէս Լիբանանէն, նոյնպէս այլ երկիրներէ: Ներկայ էին Հայաստանի մէջ պաշտօնավարող Լիբանանի եւ Սուրիոյ դեսպանները, ինչպէս նաեւ մեծ թիւով հաւատացեալներ:
Պատարագը մատուցեցին Հայ Կաթողիկէ Պատրիարք Գերերջանիկ Տէր Ռաֆայէլ Մինասեանի ներկայացուցիչ Գերապայծառ Գէորգ Ասատուրեան Եպիսկոպոսն ու Լիբանանի Զահլէ (Նիքոլա Ապու Ֆայսալի ծննդավայր) գիւղաքաղաքի Մարոնի եկեղեցուոյ առաջնորդ` Ժոզեֆ Մուաուատ Եպիսկոպոսը: Արարողութիւնը հեռարձակուեցաւ Լիբանանի OTV հեռուստակայանէն:
Հոգեպարար սոյն արարողութեան աւարտին, յայտարարուեցաւ, որ այսուհետեւ, ամէն ամսուան 22-ին պատարագ պիտի մատուցուի Սուրբ Շարպելի Հայաստանի ուխտավայրին մէջ:
