Սեպտեմբերի 8-ին Թալինում կայացավ միջազգային ճանաչմամբ սլովեն նկարիչ Մարկո Յակշեի «Առաջին անգամ այստեղ» ցուցահանդեսը: Այն ներկայացնում է նկարչի յուղաներկով աշխատանքները՝ ստեղծված նրա առաջին արվեստի կացարանում՝ Թալինում: Առաջին անգամ հայտնվելով հայկական բնաշխարհում ու գյուղական վայրում՝ Յակշեն իր տպավորություններն ու զգացողությունները փոխանցել է կտավին՝ համադրելով դիտողականությունը եւ մեղմ երեւակայական շեշտադրումը: Նրա աշխատանքներում բնության, բույսերի, լույսի եւ հողի տեքստուրաները վերածվում են մտահուզող ու խորհրդանշական պատկերների, որոնք դիտողին ներկայացնում են ծանոթ միջավայրը նոր հայացքով ու փոքր-ինչ ֆանտաստիկ շեշտադրումներով:
Մարկո Յակշեն (ծն. 1959, Լյուբլյանա, Սլովենիա) 1987 թ. ավարտել է Լյուբլյանայի Գեղարվեստի Ակադեմիան եւ 1993-ից ապրում եւ ստեղծագործում է որպես ազատ վարպետ Սլովենիայի գյուղական միջավայրում: Նա հայտնի է իր յուրահատուկ նկարչական լեզվով՝ համադրելով պատկերային պատումը, արտահայտիչ գույները եւ հորինվածքը, ուսումնասիրելով իրականության եւ երեւակայության հավասարակշռումը: Բնությունը, բույսերը, կենդանիները եւ մշակույթը հաճախ հանդիսանում են նրա աշխատանքների ներշնչման աղբյուր: Յակշեն մասնակցել է բազմաթիվ ցուցահանդեսների, այդ թվում՝ Վենետիկի 59-րդ Բիենալեին (2022) Սլովենիայի տաղավարում: Հայաստանում իր առաջին այցի ընթացքում նա սերտորեն աշխատել է տեղական համայնքի եւ բնության հետ՝ ստեղծելով կտավներ, որոնք միավորում են հիշողությունը, մարդուն եւ բնությունը՝ ինտիմ, երեւակայական եւ տեղայնորեն հիմնավորված տեսլականով:
Արվեստի կացարանը OASis ծրագրի մասն է, որը Եվրոպայում ստեղծագործական տարածքների ցանց է ու նպատակ ունի արվեստը հասանելի դարձնել լայն հասարակությանը: Այն միավորում է 13 արվեստավայր 10 երկրներում (Հայաստան, Բելգիա, Ֆրանսիա, Վրաստան, Հունգարիա, Իտալիա, Լեհաստան, Պորտուգալիա, Սլովակիա եւ Սլովենիա) եւ համաֆինանսավորվում է Եվրամիության Creative Europe ծրագրի կողմից:
ԼԻԼԻԹ ՍՏԵՓԱՆՅԱՆ
