Ջրաներկ դիմանկարների, բնանկարների, նատյուրմորտների ու քաղաքային տեսարանների գունեղ մի ընտրանի է ներկայացված Գյումրու ճանաչված արվեստագետ, ՀՀ վաստակավոր նկարիչ Սամվել Լաճիկյանի գործերի անհատական ցուցահանդեսում, որի բազմամարդ բացումը անցած ուրբաթ տեղի ունեցավ քաղաքիս Ասլամազյան քույրերի պատկերասրահում: «Ջրաներկի հմայքը» խորագրով այս ցուցադրությունը ճանապարհ անցած, տարբեր ոճերով ու ժանրերով ստեղծագործող նկարչի յուրատեսակ հարգանքի տուրքն է գեղանկարչական այն նյութին, որով նա ժամանակին մուտք է գործել կերպարվեստի աշխարհ:
1953 թ. հոկտեմբերին Լենինական-Գյումրիում ծնված, Կարսից սերող արվեստասեր ընտանիքի զավակ Սամվել Լաճիկյանը միջնակարգ եւ նկարչական դպրոցներում սովորելուց հետո ստացել էր ճարտարագիտական բարձրագույն կրթություն, բայց նրա ճանապարհն ուրիշ էր: Նա արդեն իսկ վստահ ոտք էր դրել արվեստի իր ճանապարհը, երբ ընդուվեց եւ էքստեռն կարգով 3 տարում ավարտեց Երեւանի գեղարվեստա-թատերական ինստիտուտի գեղանկարի բաժինը: Նրա մուտքը կերպարվեստ ժամանակին գնահատել ու ողջունել են գեղանկարիչներ Գրիգոր Խանջյանն ու Հակոբ Հակոբյանը, ակադեմիկոսներ Լեւոն Հախվերդյանը, Ռուբեն Զարյանը: «Դիմանկարի ժանրում Սամվել Լաճիկյանի հաջողությունները բացարձակ են: Նմանությունը, բնավորության բացահայտումը, հոգեկան գծերի յուրահատկությունը,- ահա ինչ է բնորոշ նրա դիմանկարներին… Եվ նկարից մեզ է նայում ոչ թե ընդհանրապես մարդ, այլ ա՛յս մարդը, միայն այս մարդը: Ասես նկարիչն ուզում է ասել՝ որքան մարդ, այնքան հոգեկան աշխարհ: Ու հասնում է իր նպատակին»,- այդ ճանապարհի դեռ առաջին նկատելի շրջանում գրել է արվեստաբան Ռուբեն Զարյանը:
Ստեղծագործելուն զուգընթաց Լաճիկյանը 1987-95 թթ. եղել է Գյումրու Մերկուրովի անվան նկարչական դպրոցի տնօրենը՝միաժամանակ ղեկավարելով Հայաստանի նկարիչների միության Գյումրու մասնաճյուղը: Բազմաթիվ անհատական ցուցահանդեսներ է ունեցել Հայաստանում եւ արտերկրում: 1995-ին բնակություն հաստատելով ԱՄՆ-ում՝ 22 տարի անց վերադարձել է հայրենի քաղաք, որտեղ նաեւ դասավանդում է «Վարդուհի» արվեստի դպրոցում:
«Նկարչին բնորոշ են կոկիկ, լուսաստվերի նուրբ անցումներով հագեցած, արտիստիկ ու նրբագեղ կոմպոզիցիաները: Մանրակրկիտ նկարված դետալները չեն խանգարում նկարների քնարական ու հուզական ընկալմանը: Լաճիկյանի հիմնական գործերը իրապաշտական են, իրականությունից ծնունդ առած՝ համեմված նկարչի հույզերով ու մտքերով»,- ներկա ցուցահանդեսի առիթով իր գրառման մեջ էլ նշել է արվեստագիտության թեկնածու Արաքս Մարգարյանը:
Վաստակավոր նկարչի աշխատանքներն այսօր ցուցադրվում են Հայաստանի եւ արտերկրի բազմաթիվ թանգարաններում ու պատկերասրահներում, գտնվում մասնավոր հավաքածուներում: Գյումրիում նա ունի մի քանի որմնանկար եւ հեղինակ է տասնյակ գրքերի նկարազարդումների:
Սեպտեմբերի սկզբին այս նույն սրահում Լաճիկյան մյուս եղբոր՝ Լեւոնի գծանկարների ցուցահանդեսն էր: Սամվել Լաճիկյանի այս ցուցահանդեսը կգործի մինչեւ նոյեմբերի 20-ը:
Իսկ եկող տարվա հոկտեմբերին նախատեսվում է հեղինակի նաեւ մյուս աշխատանքների մեծ ցուցադրությունը մայրաքաղաքում՝ Հայաստանի նկարիչների միության ցուցասրահում:
ԳԵՂԱՄ ՄԿՐՏՉՅԱՆ
