Երեւանի փոխքաղաքապետ Տիգրան Ավինյանը, ՀՀ կրթության, գիտության, մշակույթի ու սպորտի նախարարությունն, ինչպես նաեւ՝ պետական ոլորտում աշխատող մանր ու միջին բոլոր չինովնիկները, իրար հերթ չտալով, երեկ ամբողջ օրը շտապում էին «ավետել», որ Հանրապետության հրապարակում՝ Պատմության թանգարանի մուտքի մոտ տեղադրված կրպակն ապամոնտաժվել է: Ստալինյան դարաշրջանին բնորոշ դիֆերամբային ոճով էին պաշտոնյաներն իրենց էջերում գրառումներ կատարում: Առհասարակ կարեւորություն ու նշանակություն չունեցող իրողությունը քաղաքապետարանն իր, նախարարությունն էլ իր անվան հետ է փորձել կապել: Թե իրականում ով է սուրճի կրպակը ապամոնտաժելու հեղինակն ու իրագործողը, բնավ էական չէ՝ այնպես, ինչպես Ամանորին ընդառաջ Հանրապետության հրապարակում կազմակերպված գերգունագեղ շոուն չէր էական:
«Հանրապետության հրապարակում ապամոնտաժվել է հանրապետական նշանակության հուշարձանի տեսքն աղավաղող կրպակը»,- Facebook-ի պաշտոնական էջում «դարակազմիկ իրադարձությունը» նման վերտառությամբ էր ներկայացրել ԿԳՄՍ նախարարությունը՝ մոռանալով, որ վերոնշյալ գերթանկարժեք լուսային շոուն կազմակերպելու ու աշխարհին զարմացնելու համար նաեւ իրենց թողտվությամբ ապականել ու աղաղավաղել են Հանրապետության հրապարակի՝ հուշարձան համարվող շենքերը: Եվ իշխանության՝ մի կրպակի ապամոնտաժումից մանկան նման ուրախանալն այն բանի հետ կարող է կապված լինել, որ հուշարձան շենքերի վրա նոր անցքեր բացելու համար, փաստորեն, հավելյալ նոր տարածք է ավելացել, հետեւաբար՝ եւս մի քանի հազար հեղույսներ կամ մեխեր կարող են խփել: Միեւնույնն է, արդեն 8000-ը կան, հետեւաբար մի քանի հազարն այսկողմ-այնկողմ ի՞նչ է փոխելու:
ՍԵՎԱԿ ՎԱՐԴՈՒՄՅԱՆ
