Եվս մեկ Ամանոր այցելեց Վալենսիայի Հայկական կիրակնօրյա դպրոց: Եվ արդեն 20-րդ Ամանորը: Իսկ կարծես երեկ էր, երբ 2004 թվականի սեպտեմբերին ստեղծված հայկական կրթօջախը նույն տարվա Ամանորին գրեթե հանպատրաստից հանդիսատեսին ներկայացավ «Հեքիաթներ» բեմականացմամբ` հիմքը դնելով արդեն ավանդույթ դարձած Ամանորյա տոնակատարությունների: Այդ ոչ վաղ անցյալից սկսած` ամեն Նոր տարի, Ձմեռ պապն ու Ձյունանուշը, հավատարիմ իրենց տված խոստումին, այցելում են օտարության մեջ մի կտոր հայրենիք ստեղծած դպրանոց եւ, իրենց պատրաստած նվերներով, ուրախացնում նրա հերոսներին` աշակերտներին: Իսկ վերջիններս էլ, իրենց սիրելի ուսուցիչների ղեկավարությամբ, ինչպես եւ ամեն տարի, պատվավոր հյուրերին ընդունում են հավուր պատշաճի` ներկայացումներով, ասմունքով, երգ ու պարով` ցույց տալով Ձմեռ պապին, որ իրենք նույնպես կատարել են իրենց խոստումները` եղել են կարգապահ, լավ են սովորել եւ տանը օգնել են ծնողներին:
Աշակերտների տոնահանդեսն ուղեկցվում էր ծնողների եւ հյուրերի ծափողջյուններով, որոնք ավելի էին ոգեւորում նրանց: Հանդեսն ավելի հայկական համ ու հոտ ստացավ կրթօջախում դեռեւս անցած տարվա մարտին բացված պարի խմբակի ելույթներով` պարուսույց Սյուզաննա Դավթյանի գլխավորությամբ:
Ձմեռ պապը 64 նվեր էր պատրաստել երեխաների համար, որոնք բաժանելուց հետո, բարեմաղթանքի խոսքեր ուղղեց հայկական կազմակերպությանը, դպրոցին, աշակերտներին, ծնողներին եւ, իհարկե, համայն աշխարհի հայությանն ու մեր Մայր հայրենիքին` մաղթելով բազում մեծ ու փոքր հաղթանակներով համեմված խաղաղության տարի:
Վերջում նշենք, որ Վալենսիայի Հայկական կիրակնօրյա դպրոցին, աշակերտներին, ուսուցչական կազմին եւ ծնողներին, Ամանորյա շնորհավորական ուղերձ են հղել կրթօջախի հետ վաղուց արդեն բարեկամական եւ ուսումնական կապեր հաստատած Երեւանի թիվ 159 ավագ դպրոցի աշակերտներն ու ուսուցիչները:
Շնորհավոր Ամանոր եւ Սուրբ Ծնունդ:
Թող որ 2025-ը լինի Հայաստանի եւ հայկական աշխարհի տարին:
ԱՐԱՐԱՏ ՀԱՅԿԱԿԱՆ ՄԻՈՒԹՅՈՒՆ
Վալենսիա, Իսպանիա
